Read Lamnso Nsùyrì Nyùy 48 Bible Online

Nsùyrì Nyùy 48 - Lamnso bible

Nsùyrì Nyùy 48

¹[57] NYÙY TÀR dzə̀ e gháʼtín, a dzə̀ á wàa burí wun feyì. Á kú a burí Nyùy wòsən é ŋkàlaʼ ye dzəə̀n rə́ə, a burí e wun gwan wo ranén.

²Gwan Sion dzə̀ e da, e kfə̀n a dzə e juŋ. Wù dzə̀ vijuŋ ve wìr msòŋ woó kitu ke nsay kidzə̀m. Dzə̀ Gwan Nyùy woo ru,[58] ŋkàlaʼ Fòn wo ghaʼtín.

³Nyùy kitú kfə́ dzə̀ é mvə̀m ŋkàlaʼ, a dzə̀ wun vitaáví vé virə̀ʼ ve tavkín ví, a wù‑uù dìn ne rú ji kiŋsìn a wun Sion.

⁴Afone‑eè bàʼtí, e suùsín, a wìy ji á funen Sion.

⁵Vé‑eè wìy, e yèn fó, shúu má áwune, fáne gháʼ, á shóʼ kileʼ.

⁶Á wáa fàn, a yàʼ moo wiíy wo wù lúm wán,

⁷a sə̀ʼ moo vikóŋ veé Tarshish ve kinsəm ki‑iì karì.

⁸Ke vèr‑iì yuun kí kù dzə̀ ke vèr yenen. NYÙY TÀR woo Taà Mànjòŋ kiŋsìn ŋkàlaʼ rə, a wù kù wíy a kìŋsìn, e dù, e jòʼsì.

⁹Áà Nyùy, vèr lóo tiy e wò lav cù, vèr kù a yòŋ, a kwàʼtì mo à rə́si din koŋ yé e wír vée.

¹⁰Rúrú, Nyùy, yír yée dzə̀ e gháʼtín. Wíri kù búri wò vitóŋtóŋ vé ndzə vidzə̀m, búri, bìʼ fo à sáʼ wíri tìítiy là kiloʼ.

¹¹Wír veé Sione wáa sheʼrí. Ntèʼ seé Juda si wáa sàvnìn, a sàvnìn bìʼ sáʼ yé yee là kiloʼ.

¹²Vèn wáa ghan, a kaarí Sion, a taŋ virùmèn ve á bomen fó vi.

¹³Vèn kaʼay virə́v vé kày vi. Vèn leéy vikiŋ vee fó vi kijuŋ. Vèn leéy, e bóo fíʼ naàrì e ŋgwàʼ ye yì wíy a koʼ.

¹⁴Á mo Nyùy Sion dzəə̀n féyì feyì. Kù dzə̀ wun Nyùy wor ŋkuuŋkùŋ, a wù kù wíy a shìy ver, e dù, e jòʼsì.