Read Lamnso Nsùyrì Nyùy 49 Bible Online

Nsùyrì Nyùy 49 - Lamnso bible

Nsùyrì Nyùy 49

¹[59] Wìr dzə̀m yú kin ki. Vitúm vidzə̀m veé kitu ke nsay vi fó vituʼùr,

²à wír ve kuʼkìné, aàghéʼnceyí, aàŋgàa mbàme, à vé kitàne.

³M yíi tir ven, é vèn wáa ker vifií. Kinyo ke m kwaʼtì ki yíi a mvə̀ʼtì vifií vén.

⁴M yíi a fo vituʼùr vém, a dzə̀ é ŋgàn, a kùm lúŋ nshì, a yòv, a naàrì nsàv.

⁵Vinyo vi ghíʼ mo, a dzə̀ m wàa fàn ka? Bó yòʼ dzə̀ m wàa fàn wír ve á ron wúu yém.

⁶Wír vìne tiir vifií vév a dzə̀ aáwuné kav, saa wún aáwuné bùʼ wo wù dzəə̀n nyanyày,

⁷a bó yòʼ dzə̀ wìr tìn kitú kfə́ fo kpúu. Bó yòʼ dzə̀ wìr yùn dzəʼə̀m rə́ fo Nyùy.

⁸Kí ghàʼ fo wìr tín kitú kfə́. A dzə̀ wìr fò ka,

⁹e bóo fíʼ shaàrì, e làa yòʼ wìy kpu?

¹⁰Rúrú, wìr dzə̀m kù yén ji afií kpúkir sa. Á kpúkir réŋréŋ mo anjìʼ wùn à viyúŋ ví kpúkirì, aá kù kpú, maʼtì káv wóv e wír ve səné.

¹¹Sayi wíy a dzə yév yee láʼ ghán sidzə̀m. Á wíy a dzə fo viyá viyá, là may, e kù wìy a dzə fo mo á fə̀m‑eè koon vímóʼ vee virə́ʼ ji vév.

¹²Yòʼ dzə̀ wìr lùúy e wun mvə̀m viwìr. Wù kù wíy kpu réŋréŋ mo nyám si kpúkirì.

¹³Á kimaysì ké wìr ve á jiŋ kév jíŋen, à ké wír ve á jumrì vinyo ve wìr vìn.

¹⁴Á kù wíy kpukír adzə̀m moo njiì. Kpúu wíy tsəəné áwune é sày, é wír Nyùyi yov nsiì aáwuné kitu. Dzə́n sév sí wíy a fòykìr e sày, é woŋ aŋkfəə wáa dzə ji láʼ yév.

¹⁵Yii bèy, Nyùy wíy taŋ mo fo kpúu. Rúrú, wù wíy lì mo e wun ghaŋ.

¹⁶Lá à yòʼ a siimé wír wo wù sàsìn, e kùʼ, a wùn à kfə́ə rəə́ kù yám yamén.

¹⁷Wù wíy kpu, e làa yòʼ lì kiŋkív ke kifa, a dù sho. Wù yòʼ wíy dù e sày wùn à vikuʼùy və́ ví.

¹⁸Wù lóo dzə, a wù dzə̀ə́ e tin, wù wàa taŋ kitú kfə́ ji wun yú a vijuŋ. Á wàa burí wun ji vinyo və́ ví du a feyì.

¹⁹Yii bèy, a wù kù wíy jùmrì ŋgwàʼ atàr və́, e tatí áwune ve bó á yòʼ dzə́ə wìy yen rán.

²⁰Yòʼ dzə̀ wìr lùúy e wun mvə̀m viwìr. Wù kù wíy kpu réŋréŋ mo nyám si kpúkirì.