Read Lamnso Nsùyrì Nyùy 5 Bible Online

Nsùyrì Nyùy 5 - Lamnso bible

Nsùyrì Nyùy 5

¹[5] Éè NYÙY TÀR, yuúrí jí sém sí. Ku yù mo m shwémé.

²Yú mo m tóŋ ji à sə́ á mo. Dzə̀ wò Fon wom, dzə̀ wò Nyùy wom, a m kù bunrì a dzə̀ wò.

³Rúrú, NYÙY TÀR, ndzə javì, à yú jí yem. Shùy tó, m bùnrì wò[6], e nèn a shìy binèr.

⁴À yòʼ dzə̀ Nyùy wo wù yii koŋ yii ye bií. Bó yòʼ dzə̀ yii ye bií wàa dzə fo à dzəə̀n.

⁵Bó yòʼ dzə̀ vé kiŋkoʼòrwùné wàa dzə vèn áwune. À yii ban vé yiì ye bií adzə̀m.

⁶À yii laar vé kimboʼtìi láarin. Rúrú, NYÙY TÀR yii nyaysì vé kinjuyrìi, nyaysì aŋgaà lam bàá adzə̀m.

⁷A m dzə̀ kém, a dzə̀ m wàa nəə́ e wò lav cù, bìʼ koŋ ye à kér fo mò é ŋàŋ. M wíy a sùyrì wò e wò lav ye ranén, a gvəʼtí e wò si, a ghvəm wò fo.

⁸Éè NYÙY TÀR, aŋgaà vém vibàné dzə̀ anín. Ku dànèr mo, é m wáa yiì kinyo ke kí gheenen wò. Ku dìn mo dzə́ə ye à taʼ ji m wáa jùmrì.

⁹Áwune bóʼti kimboʼtì, kér shilív she bi shí. Shuu wóví dzə̀ wú wày wír e sày, á laarì sí se wíri e jí sév sí.

¹⁰Éè Nyùy, yìi, aáwune beʼey lòn wóv, é kinyo ke á táŋ e wírí bàm kí koó a dzə̀ áwune. Ku jùm áwune fo wò si, bìʼ yii yév ye bií yeé ŋàŋ. Áwune tèn ne kinyo ké.

¹¹Yii bèy, ké wìr ve á lir e wò wùn, ku yiì, aá wáa yu vijuŋ, a yòv ghán sidzə̀m, a sàvnìn. Kú a kìŋsìn áwune, é wír ve á koŋ wòo wáa sheʼrí, a nàn yír yé.

¹²Rúrú, NYÙY TÀR, à yii səəvì wír wo wù yúnin wò, a koŋ ye à koŋ wune kiŋsìn wun moo ŋkeè rə̀r.