Read Lamnso Nsùyrì Nyùy 50 Bible Online

Nsùyrì Nyùy 50 - Lamnso bible

Nsùyrì Nyùy 50

¹[60] NYÙY TÀR sùŋnín ne, wun woo Nyùy woo Ŋgaà Vitaàví Vidzə̀m. Wù tòóy ne wír veé kitu ke nsay adzə̀m, e kèʼ fo shùy yii tó, e dù, e meé fo yì yii nəə.

²Wun woo Nyùy kù dzə̀ é Sion, bán moo shúy. Sion woo ŋkàlaʼ ye á bomen, yì wáa bòŋkìr, a njàʼkìr.

³Nyùy wòsən wiyì, a bó yòʼ dzə̀ wù kfə̀n gòʼ kisə́sə. Və́y wo wú laar virə́ʼ láariné baári fo wun mbìy, a wù shaa e mvə̀m kinsəm ke wiy kí, a kí kar virə́ʼ.

⁴Wù jaŋ yúv, jaŋ nsay ji á wiy, e tìím a vinjen. Á ku lèéy a mo wun yíi a saʼ wír və́.

⁵Wù suuy bèy, yoŋ jii, «Wír vémé báʼtí e mǒ si. Wír ve á tíy e mǒ wùn adzə̀me báʼtí, wir dzə̀m, ve vé‑eè gwàrìn *mensaŋ vèr áwune, gwar bèy, seé nyám, cu mo shó.»

⁶Rúrú, yúví din ji Nyùy dzə̀ là kiloʼ. Kù mày wun wo dzə̀ wù tìnén nsaʼ wìr dzə̀m.

⁷Éè wìr vem, vèn yuúrí, é m súŋnín. Éè Isray, m yíi a dìn ji vèn jày á ne. Kù dzə̀ mo Nyùy woo Nyùy won.

⁸Bó m yòʼ sáʼ ven bìʼ nyám se vèn seéri, cu mo shó. M yòʼ sáʼ ven bìʼ cu se vèn ton e mǒ si ghán sidzə̀m.

⁹Yii bèy, m yòʼ kér shií áàmbòŋ, bo vèn wáa wìy sho fo kwaʼ nyàm, a cù mo shó. M yòʼ kér shií é vibev ve vèn fəər fo věn ŋgoo bvəy.

¹⁰Nyám se sí dzəə̀n é kòv sidzə̀m si dzə̀ sém. Kér mo anàʼ ve á dzəə̀n áàgwan ansə̀kì ansə̀kì.

¹¹M kì menə́n me mè féŋ e yuv medzə̀m. Kifá kidzə̀m ke kí ghán e kwaʼ ki kù dzə̀ kém.

¹²A jìŋ fə̀m kì yár mo, la m yòʼ fə̀m a suúy e vèn. Kitú ke nsay ki dzə̀ kém, à kifá kidzə̀m ke kí dzəə̀n shó ki.

¹³M yii kfə́r mbòŋ à? M yii nó mensə́ me bvəy à?

¹⁴Vèn kú a seerí nyám se cù si, a beèrì Nyùy sho. Vèn yii ri vinyo ve vèn‑eè kàʼàn Taà Vitu sho.

¹⁵Vèn wáa toŋ rì e mò é ghan sé ŋgeʼ, é m wìy fə̀ə́r ven fó fo, é vèn wáa burí mo.

¹⁶Yii bèy, Nyùy suuy e wír ve á méŋ wune jii, «Vèn lì ghay fo feé, e bó a yòŋ sáʼ yém akàŋ akàŋ, a suŋnín kùm ntò se *mensàŋ mem.

¹⁷Vèn ban fo á sər ven fo věn liì kisaŋ, tén fóo yiì kinyo ke m suuyin.

¹⁸Vèn yén shóŋ, á kfə̀n ji ŋkar sə́, shém ŋgoo wír ve á li vikìy wíri.

¹⁹Kiláyláy kén kí caʼcàʼ e kinyò ke bi kí. Vèn kù bóm a dzə̀ kimboʼtì e shúu.

²⁰Vèn dzəʼə̀mè, á kù a sem a dzə̀ afə́r vén, a toy vinyo e wón ayìy véné bàm.

²¹Vèn‑eè yii vinyo vìn, a m dzə́ kisə́sə, a vèn kwaʼtì ji m dzə̀ á moo ven. Yii bèy lèn, m kantì ven. M kù neer vinyo vén e věn si lèn tèéter.

²²«Ven ve á laysìn Nyùy, vèn səəm kin ki. Vèn səəm, fo m yiì sàtì ven, é la wìr yòʼ a dzə wóo sə ven.

²³Cu ye m kòŋèné dzə̀ ji wìr beeri mo, a sì ghvə́m ye ruú. A wìr ghán e mǒ mbòv, bo m kù yíi dìn ŋgaàŋ mo mo woo Nyùy yii luŋèr wíri.»