Read Lamnso Nsùyrì Nyùy 51 Bible Online

Nsùyrì Nyùy 51 - Lamnso bible

Nsùyrì Nyùy 51

¹[61] Éè Nyùy, shám mendzə̀n mem mè. Ku shàm mo, bìʼ fo à yii koŋ wír vé kóŋen. Sə́ʼsí ajay vémé, bìʼ fo à yii shám wíri é ŋàŋ.

²Sù lóm sém sí kijuŋ fo mǒ wùn. Yìi, é m rán fo mǒ kinyò ke bi kí.

³M kù kì ajay vém ve m jayin, a m yén vinyo vém ve bi ví ghán sidzə̀m.

⁴M kù jày ne a dzə̀ e wò, e wò cáʼcáʼ, e yiì kinyo ke dzəə̀n ke bi kí e wò si. Á bèy, à kù sàʼ ne mo réŋ, a bó jay yòʼ dzə̀ é kinyò ke à tinen.

⁵Rúrú, yè wor‑iì bóŋ bvəm yém, a m kù sì ŋgaà vinyò ve bi ví. Á wáa dzəə́ mo, a m kù sì é mvə̀m jay.

⁶Rúrú, à kér ké shií é suuyrú wo wù lo a dzə̀ fó shiliv. Ku yèʼéy mo vifií vé, é ví nəə́ e mǒ kwàʼtì.

⁷Shàʼàr jay wom, é m wáa dzə kiránén, e sù mo, é m rán ji pěy.

⁸Ku yiì, é m wáa dzə vèr à kishéʼrì ki, à vijuŋ vi. Ku yiì, é wún wóm wo à bvəʼtiné kfə́n a yu vijuŋ.

⁹Làysìn vinyo ve bi ve m yiìn ví, e sə̀ʼsí ajay vémé adzə̀m.

¹⁰Éè Nyùy, fíyír shilív shém shí, é shí wáa dzə là shilóm, é m wáa yunín wò.

¹¹Lá à yòʼ jùm mo fo wò si. Lá à yòʼ sə̀ Kiyoy ké ke Ranén kí fo mò.

¹²Kfən fò mo kishéʼrì ke kí lo fo lùŋèr ye à luŋèr mo. Ku yiì, é m wáa ker shií wó a yunín wò.

¹³Á bèy, é m nèn yiì a yeʼéy wír ve á shóʼor nsər yè, a yeʼéy mo á wáa ghan e wò mbòv, yéʼeyì, áàŋgàa yiì yee bií binkir, a yunín wò.

¹⁴Éè Nyùy, wò woo ŋgaà lùŋèr wom, sù njò yem yee bìʼ kinjuyrìwìr, é m boy, a fuŋ yòv, a fìʼtì mo à dzəə̀n e juŋ.

¹⁵Éè NYÙY TÀR, mvə̀ʼ shuu wómé, é m yiì a burí wò.

¹⁶Rúrú, bó à yòʼ kér shií é ntàŋrí, a m fə̀m kì fò cu ye tonèné, la kí yòʼ fə̀m a gheén wò.

¹⁷Éè Nyùy, cu ye yí gheen wòo kù dzə̀ shilív she shí diyì, tóŋ e wò. Bó à yòʼ yíi ŋwáy wír wo wù sov kitú bìʼ kinyo ke wù jayin, a toŋ e wò.

¹⁸Kú a kòŋ ŋkàlaʼ yee Sion, a yiì kijuŋ sho. Ku kfə̀n bòm virə́v vé kày ye yí gìŋèn Jerusaleme.

¹⁹À siir fo, áà nèn a yu vijuŋ bìʼ cu yee réŋé ye á yii fo, cu yee tòn nyám e dzə̀m, cu ye və́yí bin fo fo. Á bèy, aá nèn a seerí ambòŋ, a cù wò sho e wò kiy cù.