Read Lamnso Nsùyrì Nyùy 52 Bible Online

Nsùyrì Nyùy 52 - Lamnso bible

Nsùyrì Nyùy 52

¹[62] Ntav və̀n, à buʼtì vinyo, dzəv nsaŋ bèn a dzə̀ ka? Nyùy kù tíy wùn à wír vəə́ kishiíy kidzə̀m, kiŋsìn áwune.

²À kù rə́si ké, báʼti a dzə̀ kighèʼ. Wò, wo à kù taʼ a dzə̀ kimboʼtì, kiliímé ké ki njím moo shwàʼ wo á baàyìn.

³À koŋ kinyo ke bi kí, e shaà ke juŋ ki, koŋ kimboʼtì, e shaà suuyrú.

⁴Wò, wo à ghán, bóʼti wíri, à kù koŋ a dzə̀ jí se kighèʼ si.

⁵Yii bèy, Nyùy yíi sènèr wò ŋkuuŋkùŋ. Wù yíi sèn wò, e sə̀ŋ, e fəə́r fo wò kibàn, e laàr wò fo kitu ke nsay láarin.

⁶Wír ve á yúnin Nyùyi wíy yen, e jaáy. Áwune wíy a sheʼ, a suúy jii,

⁷«Ku yèn ntav wo wù‑uù tenen fóo lìr e Nyùy sar vàv, kù tiir vifií a dzə̀ e wun kifàʼ, tiir vifií a dzə̀ é vinyò ve wù buʼtì.»

⁸A m dzə̀ kém ji kicí ké *oliv ke kí rəsìn ji lìŋ, a kí tíy a dzə̀ e Nyùy lav. M tiir vifií a dzə̀ e Nyùy wùn, Nyùy wo wù yii koŋ wír və́, a m kù wíy a tiír bèy, e dù, e jòʼsì.

⁹Á bèy, Nyùy, m wíy a beèrì wò viyá viyá là may, a beèrì wò bìʼ vinyo ve ghaʼtín ve à yiìn. M wíy tiím e wír vée mvəm, a fìʼtì yír yé ji à dzə̀ á rú e juŋ.