Read Lamnso Nsùyrì Nyùy 55 Bible Online

Nsùyrì Nyùy 55 - Lamnso bible

Nsùyrì Nyùy 55

¹[65] Éè NYÙY TÀR, yuúrí bunrì yémé. M lón wò feyì, lá à yòʼ bùʼúr.

²Yuúrí kinyo kém kí, e bìnèr. M kù sí shwíkir shwìkín e mǒ mvə̀m ŋgeʼ.

³Vifií ví sí bvəə́ri mo bvəə̀rín, bvəə́ri, bìʼ njèʼèr aŋgaà vém vibàn, bìʼ nə̀ʼsì wo wír ve á méŋ Nyùyi nəʼsì mo. Áwune wiy e ŋgeʼ si e mǒ wùn, shwiiy kilòŋ vèr áwune, ban mo.

⁴Shilív shí búʼ mo. Fán kpuu sùm ne mo.

⁵M sí fan, yaʼ yàʼàn, a wúné beéme mo beémén.

⁶M siíme ji a m kì kér vav e njà kibìŋ, bo m kì fèŋ, e dù tàʼ fóo yòyrì.

⁷Bo m kù fèŋ, e dù kwaʼda, e dzə̀ʼtì e kirə̀ʼ ké woʼ kí.

⁸Bo m kù dù cér, e beè e kirə̀ʼ, e bàʼàr kinsəm ke biibí ke kí siʼìr mo kin.

⁹Éè NYÙY TÀR, ku bvə̀ə́r wír ve bi víne. Ku tòvsìn lám wóví tóvsin. Ŋkàlaʼ sì kitáŋnìn kitáŋnìn, melaà melaà.

¹⁰Á sí woóne, kaári kay yeé ŋkàlaʼ e shùy, kaári vitsə́ʼə́, a ŋkàlaʼ sí rún e kighèʼ ki, rún e ŋgeʼ si.

¹¹Fóo sí bvəə́ri, mayì. Á kù sí nəʼsì wíri nə́ʼsin, shwiv áwune shwívin é mentàrnín.

¹²A kì ron ŋgaà vibàn wom wúu yém, bo m kù kì kùr tím, e kfə̀mén. A kì kóʼor wír wún e mǒ kitu, wír wo wù méŋ kinyo kém, bo m kù kì lìr fó fo.

¹³Yii bèy, dzə̀ wò wo wòsò‑oò dzəə̀n ji kifá kimòʼón, wò, woo ŋgaà wom ŋgoo, ŋkar yem tìm fó fo.

¹⁴Wòsò‑oò lo, á bònen kùr viyoy bèn e mbòŋ, Wòsò‑oò lo, a tàtí, a suyrì Nyùy e lav cù.

¹⁵Mbaà, la kpúu kú si nyàʼtí rì, e lì aŋgaà vém vibàn adzə̀m à? La yí kù si lì rì, aá du áàŋkfəə́ wòŋ atin à? Yii ye bií, a kù sì kinyo ke meliv mev mè tíy sho.

¹⁶Fo mò, m kù mbaa kém a dzə̀ Nyùy, a wun woo NYÙY TÀR kù wíy sə mo.

¹⁷M fiʼtì ŋgeʼ sém e wun, diyì. M fiʼtì kijàvndzə, fiʼtì e shùy, fiʼtì vitsə́ʼə́, a wù kù yíi yu tóŋ yém, e sə mo.

¹⁸Aàŋgaà vém vibàné fə̀m kùʼ e le, bo wù kù yíi bòyìr mo fó rər se á ghíʼ mo shó.

¹⁹Nyùy yíi yu, e sèn áwune, aá gbukir, wun woo Nyùy, wo sáʼ rəə́ dzəə̀n fó ghán sidzə̀m. Wù kù yíi sèn, bìʼ fo bó á yòʼ kúvsin liì wov, a bó á yòʼ fan wun woo Nyùy gheéy.

²⁰Ŋgaà wom ŋgoo kù sí ban sa ŋkar sə́. Wù màʼ ne mbàŋ mensàŋ, e yàʼáy.

²¹Kisúŋnìn kfə́ kí nyom moo vilu, yii bèy, a wù dzə̀ ŋgaà lǎm baà. Jí se sí fəə́ fo wun shuù si rəsìn moo meŋgvə́r, yii bèy, a sí njím moo shwàʼ wo á baàyìn.

²²Éè mǒ vèné, ku wày akíghàʼ vée a dzə̀ e Nyùy kiwo. Ku wày bey, é wù wáa kìŋsìn wò. Bó yòʼ dzə̀ wù wìy màʼtì, kifá ki sə̀ʼ wír ve á yúnin wun.

²³Áà Nyùy, à wíy sèn wír vìn, e dzəə̀mè. Áwune vin ve á yúyri wíri, bóʼti kimboʼtì. Á kù wíy kpu, a bó á yoʼ mèé e ntìntìn wìr. Yii bèy, m kù wíy a dzə kém, a yu a dzə̀ fo wò.