Read Lamnso Nsùyrì Nyùy 56 Bible Online

Nsùyrì Nyùy 56 - Lamnso bible

Nsùyrì Nyùy 56

¹[66] Éè Nyùy, shám mendzən mem mè, wíri sí nyavrì e mò. Á kù sí funèn mo là yar, táy mo tayín.

²Á nyavrì e mò kishiíy kifur. Rúrú, wíri kù sí kóʼnin kòʼnín anín, funèn mo.

³M lóo dzə, lóo fàn, m kù a tiír vifií a dzə̀ e wò wùn.

⁴M tiir vifií a dzə̀ e Nyùy wùn. Wù kàʼ ne ji wun yíi sə a mo, a m búri wun, e làa yòʼ a fàn. A dzə̀ wìr msòŋ yiì ka e mò?

⁵Kù dzə̀ kishiíy kidzə̀m mo á wóŋ wúu yém, kù táŋ a dzə̀ kinyo ke bi kí e mǒ bàm.

⁶Aŋgaà vém vibàné bàʼtí, a woóy mo. Á shwéʼ ghán yém, taáme ji á yúyrí mo. Á téʼ mo ji á yúyrí.

⁷Éè Nyùy, màʼ ŋgeʼ aáwuné kitu, ku màʼ bìʼ kinyo kév ke bi kí. Shwiíy kilòŋ kí, e sə̀ʼə́r kóy wóví é nsay.

⁸À kì mo shilív shí gáʼ mo. Wáy mensíy mem mè e nsiŋ, e yèn mo m toŋen ne. Rúrú, à tàŋ ne mo mè dzəə̀n, e sàŋ e wò ŋwàʼ.

⁹Kishiíy ke m wíy mbaà wò ji à sə́ mo, áàŋgaà vém vibàné léʼkír. A m kìíy kin, bìʼ fo Nyùy tóm mo.

¹⁰M kù búri a dzə̀ ŋkàʼmé wo Nyùy kàʼàn,

¹¹tiir vifií a dzə̀ e wun wùn, e làa yòʼ a fàn. A dzə̀ wìr msòŋ yiì ka e mò?

¹²Rúrú, Nyùy, m kù wíy runér kilìʼ ke mò‑oò yiìn. M rúnerì, é m fó cu yée beèrì wò sho.

¹³À fə̀ə́r ne mo fo kpúu wo. À sə̀ ne mo fo m bayrin, e gbù, e yiì, m wáa ghan e wò si, a yen rán ye à fó e wíri.