Read Lamnso Nsùyrì Nyùy 57 Bible Online

Nsùyrì Nyùy 57 - Lamnso bible

Nsùyrì Nyùy 57

¹[67] Éè Nyùy, shám mendzən mem mè, ku shàm mendzən mem mè. M kù lir a dzə̀ e wò wùn. À kiŋsìn mo mo shinə́n shí kùʼtí wán, a m kù yíi a lìr, e meé mo ŋgeʼ si yíi sə̀ʼsì, e shaà.

²M tóŋ e Nyùy woo Taà Vitu, Nyùy wo wù yii, a m dzə́ kifá ke wù taʼà.

³Wù kù yíi yu tóŋ yém é yuv, e wìy, e lùŋèr mo, e màʼ wír ve á kóʼri e mǒ kitu, aá wáa woomé. Wù yíi dìn mo wù koŋ wír və́, tíy wùn áwune.

⁴M dzə́ bèn, aàŋgàa vibàné gìŋ ne mo, e tàr, aá dzə̀ moo abvərə̀ʼ ve jìŋ yárí, aá taʼ jav wìr. Sóŋ sév sí njím moo njàʼ se kòŋ, njím moo kitú ke mvə̀n. Kiliímé kév kí dzə̀ moo shwàʼ wo á baàyìn.

⁵Éè Nyùy, dìn vitaáví vé vi é ntoò yùv. Rúnér kitú ke nsay ki kidzə̀m e vikuʼùy vé vi.

⁶Á kòʼór ne kitám ji m li shó, a m kù sì kém ji nyam lòn. Á tùŋ ne bií ji m gbu shó, nen siì lò áwune, e gbù sho.

⁷Rúrú, Nyùy, shilív shém shí tùúy ne e wò wùn. Shí kù tùúy ne a dzə̀ e wò wùn. M yíi a yòv, a burí wò.

⁸Mo‑óò yimen, a yòv, a yìmrì lúŋ sí, a dzə̀ yé nshìí. Mo‑óò yov, e yìmrì shúy, é ndzə rán.

⁹Rúrú, NYÙY TÀR, m yíi a beèrì wò e wírí mvəm. M yíi a yòv, a burí wò e vitúm ví mvəm.

¹⁰Koŋ yé ye à koŋ wír vée kùʼ feyì. Yí kùʼ feyì, a bó mfìʼ yòʼ dzə̀, aà kù yíi a tiy vèn áwune, e dù, e jòʼsì.

¹¹Éè Nyùy, dìn vitaáví vé vi é ntoò yùv. Rúnér kitú ke nsay ki kidzə̀m e vikuʼùy vé vi.