Read Lamnso Nsùyrì Nyùy 58 Bible Online

Nsùyrì Nyùy 58 - Lamnso bible

Nsùyrì Nyùy 58

¹[68] Ven vee vé saʼa, vèn kù yòʼ fó sáʼ réŋ á? Vèn kù yòʼ sáʼ wíri là kiloʼ a?

²Bó yòʼ dzə̀ bey. Vèn kù kwaʼtì a dzə̀ kinyo ke bi kée yiì, buʼtì vinyo e wòŋ, táy wíri tayín.

³Wír ve bií kù‑uù jày ne dzə́ə, e kèʼ fo bvə̀m. Á kù‑uù sí jáy vinyo, bóʼti kimboʼtì, e kèʼ fo meterí.

⁴Áwune dzə̀ ji yó ye yì kér ndzəʼ e shuù. Á dzə̀ ji búv wo wù yòʼ yú kinyo, a bó yòʼ dzə̀ á yèʼéy, e mèrìr.

⁵Búv və̀n yòʼ yú jí wìr wo wù sər wun, a bó yòʼ dzə̀ wù kòóy yòv ŋgaà səm, jòkìnyàʼ e bó a cèŋ.

⁶Éè Nyùy, bvə́ʼə́y sóŋ sé abvərə̀ʼ víne, e shòʼtí viŋkoònyàm ve sòŋ ví fo áwuné shuù.

⁷Ku yiì, aáwune ŋeémé, e lày moo kibúŋrí, aá nyeŋri áwune, aá yúm moo viŋgà.

⁸Áwune ku kfə̀n moo kitàʼ ke kí lóo ghan, kí wàa jiíy, a rèŋ, a mày, a dzə moo wán wo á tiimen bvəm, wù shaá sháan.

⁹Á ku laàr áwune é kimbùmmbúm, aá lay cér, e shaà mo kì dzə̀ ntòn yù və́y.[69]

¹⁰Wír ve á yúnin Nyùyi wíy lòo yen mo wù maʼ ŋgeʼ e wír ve bií, aá wáa sheʼrí. Áwune kù wíy a sù wúu yév e wír ve bií mensə.

¹¹Wíri wíy a binsí jii, «Rúrú, wír ve á yúnin Nyùyi kér vilaámé.» Á wíy a binsí jii, «Rúrú, Nyùy dzə̀ shó wo wù sáʼ kitú ke nsay.»