Read Lamnso Nsùyrì Nyùy 59 Bible Online

Nsùyrì Nyùy 59 - Lamnso bible

Nsùyrì Nyùy 59

¹[70] Éè Nyùy wom, bòyìr mo fo aŋgaà vém vibàné wo. Kìŋsìn mo fo wír ve á guutì moó.

²Bòyìr mo fo wír ve bi víné wo. Ku sə̀ mo, fo áwune yúyrí mo.

³Yén ri mo á lìrìn ne, a teʼ ji á yúyrí mo, a dzə̀ vintav ve wíri mo ví kaayin mo. Éè NYÙY TÀR, áwune wooy ji á yúyrí mo, mo ben là njò, a bó m yoʼ yiì kinyo ke bi kí.

⁴Áwune wooy ji á yúyrí mo, mo ben là njò. Ku wìy, e yèn, e sə̀ mo.

⁵NYÙY TÀR, Nyùy woo Taà Mànjòŋ, à dzə̀ Nyùy wìr veé Isray. Yìmrì kitú ké ki, e màʼ ŋgeʼ e vitúm vi vidzə̀m. Lá à yòʼ bàvtí wír ve á wooy wír vé wooyín.

⁶Áwune lóo kfən e bàm aŋkuùr adzə̀m, á wàa wamnín moo jwí si, a sooné e mvə̀m ŋkàlaʼ.

⁷Áwune vísə, mo á nyamnìnè. Á shuʼ vinyo ve beemén ví fó shuù, kwaʼtì jii, «A dzə̀ yù la kinyo ke vèr suuyì?»

⁸Rúrú, NYÙY TÀR, à shéʼ ké áwune shéʼén. À ŋwáy vitúm vee shooy ŋwáyín.

⁹Nyùy wom, à dzə̀ vitaáví vém. M yíi a kìʼ a dzə̀ wò. Kù dzə̀ wò kirə́ʼ kém ké kilìr.

¹⁰Nyùy wom wo m ghvə́mé yíi wìy, e sə mo. Wù yíi sə̀ mo bìʼ koŋ ye wù koŋ mo. Wù yíi yiì, é m yov nsiì aàŋgaà vém vibàné kitu.

¹¹Rúrú, Nyùy, kù dzə̀ wò ŋkeè wor rə̀r. Yii bèy, lá à yòʼ kù yùyrí aŋgaà vér vibàn kàŋ mòʼón, fo wír vémé laysin lim yé ye ghaʼtíné. Ku màʼ áwune máʼan e vitaáví vé vi. Ku tàʼár áwune, aá wáa jan janén.

¹²Kiŋkoʼòrwùn kév kí ku kfə̀n ji kitám. Kí ku koò áwune mo á koò nyám e kitam, bìʼ vinyo vév ve bi ví, à jí se bi se sí fəə́ fo áwuné shuù si, à roʼ ye á roʼ wíri, à kimboʼtì ke á fəər fo shuù ki.

¹³Laàr áwune e wò mvə̀m dòʼshwiíy. Ku laàr áwune, e laàr laàrìn ŋkuuŋkùŋ, é wìr msòŋ kiíy ji sáʼ a Nyùy wìr veé Isray, a wù kù wíy a saʼ, e dù, e meé mo ndzə wíy mày.

¹⁴Aŋgaà vém vibàné lóo kfən e bàm aŋkuùr adzə̀m, á wàa wam moo jwí si, a ghan, a sooné e mvə̀m ŋkàlaʼ.

¹⁵Á ghán, shwaá, taʼ kifá kée yi, taʼ ntéŋ, á nèn a nyàmkìr nyàmkìn.

¹⁶Fo kém kí, m yíi a yòv, a fìʼtì vitaáví vé. Ndzə ráné, é m fúŋ yòv bìʼ koŋ yé. Rúrú, à kù‑uù sì kikiŋ kém, a dzə̀ kirə́ʼ kém ké kilìr e ghan sé ŋgeʼ.

¹⁷Nyùy wom, m kù yíi a yòv, a burí wò bìʼ vitaáví vé, aà dzə̀ kirə́ʼ kém ké kilìr, a dzə Nyùy wo wù din koŋ rə́ e mò.