Read Lamnso Nsùyrì Nyùy 60 Bible Online

Nsùyrì Nyùy 60 - Lamnso bible

Nsùyrì Nyùy 60

¹[71] Éè Nyùy, à mèŋ ne ver, e sàʼtì vikiŋ vér. Wò‑oò shwìíy kilòŋ vèsən, ku siìr ver e wò wùn lèn.

²Wò‑oò yiì, nsay sə́ʼsí, e shàʼkìr. Ku sə̀tí viŋgwáʼ vee shooy vi, ví sí gheŋènè.

³À yiì ne, wír vée yén ŋgeʼ ye yì meen é ŋgeʼ, vèr fénkir bìʼ meluʼ me à yiìn, vèr nó.

⁴Yii bey, à ku tùy cícíwàr wó bìʼ wír ve á ghvə́m wò, e tùy ji á wáa nyeŋ fó, e fíʼ bòy fo mvə̀n se á maʼ áwune shó.

⁵Sə́ ver e vitaáví vé ve ghaʼán ví. Yú tóŋ yérí, e bòyìr wír ve dzəə̀n vée.

⁶Nyùy sùŋnín ne fo wun kirə̀ʼ ke ranén kí jii, «Mo m tavin ne, e ghàʼ, m yíi jàv ŋkàlaʼ yee Shekem, e toʼtí Kiwoóy ké Sukkot, e jàv e wír vémé.

⁷Kér mo nsay Gilead, a rám Manassèe dzə̀ yém. Yé Efrayime wáa dzə tán yém kishàa, a yé Judàa dzə̀ kitoómé kém.

⁸Kitúm kee Moav ki kù dzə̀ kfə́ mbǐʼ mendzə̀v, mbìʼ wo m su wúu yém shó, woŋ Edome wáa dzə fo m yíi shwèy alábáʼ vém. Kù‑uù tòn mo fó, a m yíi a yòv nsiì e wír veé Filistiàá kitu.»

⁹Éè mǒ vèné, yíi dànèr la mo, é bo á du, e tòn Edom? Yíi lì la mo, é bo á nəə́ é ŋkàlaʼ ye á gìŋèn e káyi?

¹⁰Éè Nyùy, à bìn ne rú ndzə̀m e vèr a? À yòʼ dzəə́ du fo mbìy, danèr vé rər vér a?

¹¹Ku sə̀ ver fo aŋgaà vér vibàné. Sə́ ye yí lo fo wírií dzə̀ kifá kisáŋ.

¹²A Nyùy lò tòm ver, bo vèr yíi so rə́r. Kù yíi koʼrí wun aàŋgàa vibàn vérí kitu.