Read Lamnso Nsùyrì Nyùy 62 Bible Online

Nsùyrì Nyùy 62 - Lamnso bible

Nsùyrì Nyùy 62

¹[73] M kfə́men, yuúri a dzə̀ Nyùy. Kù dzə̀ wun cáʼ ŋgaà lùŋèr wom.

²Dzə̀ wun kilán kém ké kilìr, a kù luŋèr wun mo. Dzə̀ wun kirə́ʼ kém ke tavín kí, a bó yòʼ dzə̀ féyì kifá ki sə̀ʼ mo.

³Vèn tàtí adzə̀m, e kàáy wir mòʼón e le? Vèn yíi a nyàvrì sho ji á yúyrí, e meé e le? Wír, a wù rə́vkír ne, e kfə̀n kiìví moo kindzə̀n ke kày.

⁴Rúrú, á kù taʼ, e sèn wun fo wun ntaʼ viwìr. Á koŋ, a boʼtí vinyo e wun bàm. Á suuy fo shuù ji bòŋ a vishí və́, yii bèy, kér e meliv ji shòv á lòn wun.

⁵Mo‑óò kfə́mén, a yuurí a dzə̀ Nyùy. Vifií vém ví kù tíy a dzə̀ e wun wùn cáʼ.

⁶Dzə̀ wun kilán kém ké kilìr, a luŋèr wun mo. Dzə̀ wun kirə́ʼ kém ke tavín kí, a bó yòʼ dzə̀ kifá ki sə̀ʼ mo.

⁷Kù boyìr Nyùy mo, nan ghay wóm. Dzə̀ wun kilán ke kí kiŋsìn mo, a m lir e wun wùn.

⁸Éè wìr vem, vèn tiír vifií ví a dzə̀ e wun wùn ghán sidzə̀m. Vèn neer akíghàʼ véné adzə̀m a dzə̀ e wun si. Kù dzə̀ Nyùy kikfə́vsì kesən.

⁹Wìr msòŋ dzə̀ ben, aàghéʼnceyí dzə̀ moo shwér, a vé kavi dzə̀ moo vinjeenjèm. Á tiir e mfìʼ, á kù kòʼ kóʼón, aá càár feyì, e shaà shwér.

¹⁰Lá vèn yòʼ a tiír vifií é kinshwìv. Lá vèn yòʼ a kwàʼtì ji dzə̀ kimfaàsì kí sə̀ ven. A bùʼ won fə̀m kùʼ, e le, lá vèn yòʼ wày shilív shó.

¹¹Nyùy sùúy ne kinyo, m yú kíwun akàŋ akàŋ. Kí dzə̀ ji kù kér a wun vitaáví vidzə̀m,

¹²a kù kér a wun koŋ fo wír vəə́, e shaàsìn. Rúrú, NYÙY TÀR, à yii kaʼày wír e dzə̀m, laáme ŋgaàŋ a dzə̀ mo wù lìmèn.