Read Lamnso Nsùyrì Nyùy 63 Bible Online

Nsùyrì Nyùy 63 - Lamnso bible

Nsùyrì Nyùy 63

¹[74] Éè Nyùy, à dzə̀ Nyùy wom wo m suyrì. M yár jiŋ yè, kér shii wò, kér feyì mo wìr keèrí shii mendzə̀v é kirə̀ʼ ké woʼ.

²Àbày, m lèéy ne wò e wò kirə̀ʼ ke ranén kí, e yèn vitaáví vé wùn à vikuʼùy vé vi.

³Koŋ ye à kér fo wír vée dzə̀ é shií, e shaà dzəʼə̀m, a m yíi a sùyrì wò, a kwa.

⁴M yíi a burí wò, e dù meé mo m wíy kpu. M yíi a nàn wó yém é yuv, a wùʼsì yír yé.

⁵Wúné yíi bòŋ mo moo wó wìr wo wù yikin fó ŋkàʼ, é m wáa yòv e kishéʼrì ki, a burí wò.

⁶M lóo neŋ e kikun, m kù a kuumé a dzə̀ wò. Vitsə́ʼ ví kóŋri, m wàa kwàʼtì vinyo ve à yiìn e mò.

⁷Kù dzə̀ wò ŋgaà sə wom, aà kùʼtí ne mo e wò sàr vàv, a m yíi a yòv a dzə̀ yòv kisheʼrì.

⁸M kù rə́ŋ a dzə̀ e wò wùn, a vitaáví vé vi kiŋ mo.

⁹Wír ve á taʼ e laàr dzəʼə̀m yémé kù wíy dù aàŋkfəə́ wòŋ.

¹⁰Á wíy yuyrí áwune é shùu rər. Á yúyri, áàkoosàʼa kfə́r dzə́n sév.

¹¹Fòn kù yíi a yu vijuŋ ve Nyùy. Wìr dzə̀m wo wù yii kilìʼ e Nyùy yir, wíy a sheʼrí, lóo sheʼrí, é shúu nèn mà vé viduu.