Read Lamnso Nsùyrì Nyùy 64 Bible Online

Nsùyrì Nyùy 64 - Lamnso bible

Nsùyrì Nyùy 64

¹[75] Éè Nyùy, ku yù tóŋ ye m tóŋée, M tóŋ, shwémkir e mvə̀m ŋgeʼ. Aŋgaà vém vibàné bémer mo. Ku kìŋsìn mo fo á yúyrí.

²Kìŋsìn mo fó menàŋ me wír ve bií kúr e mǒ bàm. Ku kìŋsìn mo fó woŋ ye aŋgàa vinyò ve bi vií wóŋ mo.

³Áwune sáy viliímé vév moo shwàʼ rə̀r. Á maʼ lám wo bií mo wìr màʼ mvən.

⁴Á wóŋ wír vee là nsem, maʼ mvən aáwuné bàm. Á sasìn, á tsə̀m áwune, e làa yòʼ a fàn.

⁵Áwune lo, á lùm liì wo bi, e kpù shó, kù bá antaŋ a dzə̀ mó a neèr vitám e kilìr, sévti ji dzə̀ yèn la ver?

⁶A dzə̀ tàr la vinyo ve vèr yii, e kìíy? Vèr dzə̀ a bá ntaŋ wo wù meen é ntaŋ. Kí tàv fóo kiíy kwaʼtì wìr msòŋ. Rúrú, kí tàv fóo kiíy shilív sə́.

⁷Nyùy kù wíy màʼ áwune e sə́ see mvən si. Wù wíy sàsìn, e màʼ mvən, e tsəm áwune shó.

⁸Nyùy kù wíy laàr áwune bìʼ shuu wóv. Wíri yén áwune, aá wáa dzə̀v kiwuú ji ajwèkòʼ.

⁹Wìr dzə̀m wíy a fàn, a fìʼtì kinyo ke Nyùy yiìn, a lì ghán, a kwàʼtì sho.

¹⁰Wír ve á yúnin NYÙY TÀRí kú a sheʼrí wun. Á kú a nyeŋ, a lìr, a dzə̀ e wun wùn. Wír ve dzəə̀n vé Nyùy adzə̀me kú a burí wun.