Read Lamnso Nsùyrì Nyùy 65 Bible Online

Nsùyrì Nyùy 65 - Lamnso bible

Nsùyrì Nyùy 65

¹[76] Rúrú, Nyùy, a dzə̀ vèr wàa burí wò e Sion. A dzə̀ vèr kù rùnér kilìʼ ke vèr yiìn e wò.

²À yú bunrì wìr ve á tóŋ e wò. Wìr msòŋ e dzə̀m kù wíy a wìy, a mbaà wò.

³Á wíy a lon wò bìʼ ajay vév. Vinyo vér ve bi ví lóo kùʼ, lóo ghaʼ ver, kii wò, à kù màn ajay vee shooy.

⁴Bòŋ ké wìr ve à shoʼon, e kòʼór e wò mentsə̀m, e kòʼór ji á wáa soorí vibuʼ vee wò lav. Vèr yíi a yu vijuŋ a dzə̀ vee wò lav, lav cù yè, a dzə̀ kirə́ʼ ké ke ranén kí.

⁵Rúrú, Nyùy, à dzə̀ ŋgaà lùŋèr wor. À yú bunrì yér, yii viŋgaʼnìn ve vinyò ji à sə́ ver. Wìr msòŋ e dzə̀m kù tiir vifií a dzə̀ e wò wùn, wir dzə̀m woó kitu ke nsay, e dù, e meé fo ndzə́ví jòʼsìn.

⁶Wò‑oò tùúy agwan fo á dzə̀kìn, e dìn vitaáví vé ve ghaʼán ví.

⁷Yii wò, a ndzə́v ye yí yorìi kpúrinè. Kù yii wò, bo yí kpúrín, a tiy ji nyaáŋ. Kù sər wò vitúm, bo ví wáa yàr melaà.

⁸Wíri yén viŋgaʼnìn ve vinyò ve à yii, jaayì. Á kù yén adzə̀m, e dù, e meé e ndzəywoŋ. À yii, a wíri séŋ, savnìnè, e kèʼ fo buu ndzə wúmóʼó, e dù e wúmóʼó.

⁹À leey fo kitú ke nsay ki, tsə́nsi wuú. À bórir kitú ke nsay e mbòómbòŋ, yii, a ndzə́v sí rún ghán sidzə̀m. Yii wò, bo wíri wáa ker vifá ve yi e nsay, a kù dzə̀ mo à baʼtin ne bèy.

¹⁰À yii, a wuú ló kijuŋ e sum, nəə e nsay ye á lìmèn. Yí nəə, a súmé bórí, a vifá vi fəə́, kúy kijuŋ.

¹¹À səəvì súm, aá káv vifá vigháʼán. À shaa e kirə̀ʼ, vifá vi kù a tsəə̀tìn tsəə̀tìn fó.

¹²Nyám se liyìn sí fúm fumén é kwaʼ, aàgwane rəsìn ji lìŋ.

¹³Njiì sə́ kwáʼ e dzə̀m, saárí sə́ viwoóy vidzə̀m, a kifá kidzə̀m ki yú vijuŋ, yov, shéʼri.