Read Lamnso Nsùyrì Nyùy 66 Bible Online

Nsùyrì Nyùy 66 - Lamnso bible

Nsùyrì Nyùy 66

¹[77] Wìr dzə̀m woó kitu ke nsay wáa ndzəʼ Nyùy.

²Á wáa yòv, a taŋ vikuʼùy və́. Á wáa burí wun, a koʼór yír rə́.

³Vèn wáa burí Nyùy, a suúy jii, «Lim sé sí dzə̀ sigháʼtín, vitaáví vé vi kùʼ e ŋàŋ, aŋgàa vibàn vée kú a yàʼ e wò si.

⁴Wìr dzə̀m tsə́m ndzəə́ e wò si, wir dzə̀m woó kitu ke nsay. Á yov luŋ si, búri wò sho, yov luŋ si, wuʼsì yír yé sho.»

⁵Vèn wiy, e yèn lim ye Nyùy lìmèné. Wù ghàʼ ne e lìm se wù lim e wìr msǒŋ mvəm sí.

⁶Wù‑uù jàvsìn rìbà ndzə̀v, fóo kfə́n é nsay ye yumér, wír vəə́ ghán, e tùmsín ndzə́v e kiwuú kí. Dzə̀ fó, fo vèr‑iì shéʼri lim rə́ é ŋàŋ.

⁷Wù sáʼ ndzə e vitaáví və́ ví, a bó sáʼ rəə́ yòʼ wíy mày. Sí rəə́ kù tíy e vitúm ví wùn, kíy áwune. Wír ve á méŋ Nyùyi wáa yen. Á wáa yen fó a tsəy kóy wùn à Nyùy.

⁸Ven vee vitúm, vèn wáa burí Nyùy wor. Vèn wáa burí, aá wáa yu kwaʼda.

⁹Wun woo Nyùy wor lèm ne ver atin, e làa yòʼ biimé áàŋgàa vibàn vérí laar ver.

¹⁰Rúrú, Nyùy, à mùm ne ver. À mùm ne ver moo kisha ke á tònèn é və̀y, *kisha ke mbàm ke fəvír kí ke á tònèn, e shèŋrì.

¹¹Wò‑oò yiì, vèr gbú é lálán, e yiì, vèr nəə́ é ŋgeʼ ye biibí.

¹²Wò‑oò màʼtì, aŋgaà vér vibàné kóʼrí e věr kitu, e màʼtì, vèr wáa yen ŋgeʼ ye tavín, yén ŋgeʼ moo wír wo kinshwíy ki kooyin wun, yén ŋgeʼ moo wír wo kúŋ liìn vifá və́. Yii bèy, à kfən lò, e lì ver, e wìy sho e kirə̀ʼ ke juŋ ki.

¹³M yíi a wìy e wò lav, a seerí nyám si, a tòn, a cù wò sho. M yíi runér ŋkàʼmé wo mò‑oò kàʼàn wò sho,

¹⁴ŋkàʼmé wo mò‑oò lìʼìn e shuu wómé, a dzə̀ é ghan se mò‑oò dzəə̀n é mvə̀m ŋgeʼ.

¹⁵M wíy a see vinsòŋ ve nyàm, a tòn, a cù wò sho, é kindzə́ʼ ke cù yee viyáʼ vi kí wáa koʼ, a kùm mbàʼ. M wíy a cù wò aàmbòŋe wùn à bvə́y si.

¹⁶Ven ve á ghvə́m Nyùyi wiy adzə̀m, e yù. M yíi a fìʼtì kinyo ke wù yiìn e mò e vèn.

¹⁷Mò‑oò tòŋ kitávín, e bì wun. Mò‑oò mbaa wun, kóʼor yír rə́.

¹⁸A dzə̀ ji mò‑oò lìtì vinyo vém ve bi ví lítin, bo NYÙY TÀR yòʼ‑oò lo yù tóŋ yém.

¹⁹Yii bèy, wù yú rúrú, e fò vituʼùr, e bìnèr bunrì yém.

²⁰M kù‑úù wáa burí NYÙY TÀR búrín. Wù yoʼ tèn fóo yu bunrì yém. Wù yoʼ yàr fó a dìn koŋ ye wù kér fo wír vəə́ e mò.