Read Lamnso Nsùyrì Nyùy 68 Bible Online

Nsùyrì Nyùy 68 - Lamnso bible

Nsùyrì Nyùy 68

¹[79] Nyùy ku ŋàʼáy, e tàʼár aŋgaà və́ vibàn. Wír ve á ban wune kú a nyeŋkír.

²Éè Nyùy, kiír áwune mo shwéri kìír kindzə́ʼ. Wír ve á méŋ Nyùyi ku lày làyìn fo wun si. Á ku lày mo ghám vilùu yaàné e və̀y.

³Wír ve á yúnin Nyùyi kú a sheʼrí kév sheʼrín. Á kú a seŋ, a sàvnìn e Nyùy si, é kishéʼrì ki wáa yuy áwune yuyín.

⁴Vèn kú a yòv, a burí Nyùy, a yòv, a wùʼsì yír rə́. Vèn kú a yòv, a koʼór yír rə́, wun wo wù ghán e kitu ke mbàʼ. Yír rəə́ dzə̀ ji NYÙY TÀR. Vèn wáa sàvnìn e wun si.

⁵Wù dzə́ e wun kirə̀ʼ ké dzə ke ranén kí, leey fo wón tsə̀ wùn à vikǐy ŋkfəə. Wù dzə̀ tàr fo alàtàrí, bin nsaʼ vikǐy ŋkfə.

⁶Nyùy lo, wù fò láʼ aàtànfódùu. Wù lo, wù fə̀ə́r vé sháŋé, e wày é bùʼ, e fò wír ve á méŋ wun a dzə̀ nsay ŋgaŋ.

⁷Aà Nyùy, wò‑oò dànèr wír vé, á wáa ghan, a tosín wóʼ,

⁸nsay nèn a sə̀ʼsì, wuú wáa cuùrì fo yuv. Virə́ʼ ví‑iì sə̀ʼsì e wò si, wò woo Nyùy woó Sinay, wò woo Nyùy wìr veé Isray.

⁹Dzə̀ rú, Nyùy, wò‑oò yiì, wuú shùʼùy fo yuv. Wò‑oò bòrír woŋ wo wò‑oò foon ji vitsə́ʼ e wír vée.

¹⁰Wò‑oò bòrír, áwune koóy kirə́ʼ ké a dzə sho, à wáa leéy fo vé kitàne, kù mo liì wò dzəə̀n e juŋ.

¹¹NYÙY TÀR‑iì tsə̀nsí ntum, vikìy ló ntum rə̀n e ŋkfə̀n, a ghan, a fìʼtì jii,

¹²«Afon wùn à vé rər véví sí nyéŋkirì. Á sí nyéŋkir nyèŋkín.» Vikìy sí jav vifá ve á kuuyin fó kwaʼ rər melav medzə̀m.

¹³A dzə̀ wìr kfə̀n gòʼ e bàm, a laáy e vibìn vé anjiì à? Vav se kibìŋ[80] sí dzə̀, aá súm e *kisha ke mbàm ke fəvír kí, a fəə si kiʼ moo kisha ke mbàm ke baar kí, a dzə̀ kee wúntí kíwun.

¹⁴Rúrú, Nyùy woo Ŋgaà Vitaàví Vidzə̀m‑eè tàʼár afon. Wù‑uù tàʼár áwune é kishiíy fóo fèy, kí wáa dzə mo gbù a mentíy e Gwan Tsalmon bèy.

¹⁵Gwan Bashan dzə̀ gwan wo wiy, a dzə̀ gwan wo wù kér aŋkoŋ fo yuv.

¹⁶Ven veé Gwan Bashan, vèn yú nyár wír veé Gwan Sion ji ka? Dzə̀ gwan wo NYÙY TÀR‑iì shoʼon ji kirə́ʼ kfə́, a wù kù wíy a dzə fo, e dù, e jòʼsì.

¹⁷NYÙY TÀR‑iì sə̀ʼə́y fó Sinay, sə́ʼəy, kér *viténtén və́ vé rər ansə̀kì ansə̀kì, e wìy, e dzə̀ʼə̀m e wun kirə̀ʼ ke ranén kí.

¹⁸Wù‑uù kóʼ Gwan Sion, tsəə́ne wír ve wù koorin fó kwaʼ rər. Kóʼ bèy, sə́ nshwì fo wíri, wír ve vé‑eè tsə́y kóy wùn áwune. NYÙY TÀR, wun woo Nyùy kù wíy a dzə a dzə̀ fó.

¹⁹Rúrú, á wáa burí NYÙY TÀR. Wù beʼèy agháʼka vesən kishiíy kidzə̀m. Dzə̀ wun wo wù luŋèr vèsən.

²⁰Nyùy wòsən dzə̀ Nyùy wo wù luŋèr wír və́. Wun woo NYÙY TÀR woo Nyùy wòsən, dzə̀ wun wo wù kér vitaáví vée tin wír fo kpúu.

²¹Nyùy kù yíi fòtì vitú ve aŋgaà və́ vibàn, vitú ve wìr ve á wayin wó e vinyò ve bi ví, e lùm, e kpù shó.

²²NYÙY TÀR sùúy ne jii, «M yíi lì aŋgaà vén vibàn fó Bashan, e kfən sho. M yíi lì áwune fó sar rìbà ndzə̀v, e wìy sho.

²³Vèn wíy a tòv mensə́ mev e wuú, lóo tòv, é jwí si wáa la sa.»

²⁴Nyùy wor èy, vèr sí yén mo à ghán e viwìr vi. Aà Nyùy woo fon wom, á kú a ghan a ji fon. Á kú a dù a e kirə̀ʼ ke dzəə̀n ké Nyùy.

²⁵Vé yòvi tiím mbìy, vé luŋé sə́r bám, wónlě ŋgòne shém fó kintìntìn, a kùm nshùm sí.

²⁶Ven vee wír veé Isray, vee wúntí áwune, vèn wáa burí Nyùy woo NYÙY TÀR. Vèn wáa burí wun e mvə̀m kintatì ke wiy kí.

²⁷Vèn leéy, rám Benjamine rə́sə mo yí shemen mbìy, rám, a yí dòr e shaà símóʼ sí. Vilìmbìy vee Juda ram ví bátír, vee Sebulon ram wùn à yé Navtalìi nen sə̀ʼ fó bàm.

²⁸Éè Nyùy, dìn vitaáví vé vi. Ku dìn mo wò‑oò din e vèr fó ŋgùʼ.

²⁹Ku dìn e vèr fo wò lav yeé Jerusalem. Dzə̀ fó, fo afone wiy e nshwìí, shwí wò sho.

³⁰Kàntì Ejiv wo wù dzəə̀n moo nyam kwaʼ ye yì dzə́ aàŋkiʼ. Wù ghàʼ ne moo ŋgoo nyar wùn à wóné. Á lo, á wàa borkír fo si, a wìy e nshwìí. Ku tàʼár vitúm ve ví koŋ rə́r ví vidzə̀m.

³¹Wír ve woŋ Ejivi tumen e nshwìí kù yíi wìy, é wír veé Etiopiàa[81] wáa ràmsì sa wó yév cér, a fo nshwì.

³²Vitúm veé kitú ke nsay, vèn wáa yòv luŋ si, a burí Nyùy. Vèn wáa yòv, a sùyrì wun woo NYÙY TÀR,

³³wun wo wù ghán e yuv wo wù‑uù bomen fó yàŋgùʼ. Vèn yuúrí mo jì rə dzəmkìr fo fo kitávín.

³⁴Vèn wáa fìʼtì vitaáví vé Nyùy. Vikuʼùy və́ ví kfə́vsi Isray, a yúví din vitaáví və́.

³⁵Wù dzə́ e wun kirə̀ʼ, a fóo beéme beèmén. Dzə̀ wun woo Nyùy wìr veé Isray. Fó wun vitaáví e wír vəə́, távir wó yév. Vèn wáa burí Nyùy.