Read Lamnso Nsùyrì Nyùy 69 Bible Online

Nsùyrì Nyùy 69 - Lamnso bible

Nsùyrì Nyùy 69

¹[82] Éè Nyùy, lùŋèr mo. M sí lay e ndzəv, a yí mèé ne e mǒ kilòŋ.

²M sí lay e kishàʼàr, a bó nsay ye tavín yòʼ dzə̀ə́. M mèé ne fo ndzə́ví shoon, a yí sí shaa e mǒ kitu.

³M tòŋ ne, e dòr, kilòŋ kí yùm ne mo, e kàʼkír. M kìʼ ne ntéŋ ntéŋ, kiʼ ji Nyùy wom wiy, e sə̀ mo, e kìʼ, sí yémé wáa səəné.

⁴Wír ve á ban mo kisáŋe kùʼ ne. Á kùʼ, e shaà nə́ŋ see mǒ kitu. Wír ve á taʼ e laàr moó ghàʼ féyì. Áwune gim mo e kimboʼtì ki, kan mo ji m siir á kifá ke bó m yoʼ shòŋ.

⁵Éè Nyùy, à kì kiyúŋsì kém. Bó à yòʼ méŋ vém vee ajay.

⁶Éè NYÙY TÀR woo Taà Ndzə, wò woo Taà Mànjòŋ, lá m yòʼ wìy yiì, é wír ve á tiir vifií e wò wùné wáa woomé. Éè Nyùy woó Isray, lá m yòʼ wìy shòór wír ve á suyrì wò.

⁷M kù sə́ liy sìn bèn a dzə̀ bìʼ wò, a woómé si sùm ne sí yém.

⁸M sì moo wir kitum aàfə́r vémé mvəm, a dzə moo kiŋgwìy e wón yè worí mvəm.

⁹M kér shií fo wò lav e ŋàŋ, a wù baári e mǒ shiliv moo və́y. Liy se wíri shur wò sho si nen bìnkìr, e kfə̀n a dzə̀ e mǒ kitu.

¹⁰Mò‑oò lèm jíŋ, a neŋ e wò si, kí nèn kfə̀n ji liy sém.

¹¹Mò‑oò màʼ vinsàʼ ve ndzə̀y, a dìy, wíri ló kév, a sheʼ mo sheʼén.

¹²Á kér yír yém é vitu ve sòŋ é mentàrnín, aàmfoòkìnoó yov mo é lùŋ.

¹³Éè NYÙY TÀR, fo kém kí, m kù bunrì, mbaa a dzə̀ wò. Éè NYÙY TÀR, ghán sí yií gheenè, à kù bìnèr kinyo kém. Ku bìnèr kinyo kém kí, bìʼ koŋ ye ghaʼáné ye à kér fo wír vée.

¹⁴Sə̀ŋ mo fo m lay é mvə̀m kishàʼàr. Fəə́r mo fo aŋgàa vibàn vémé mvəm. Fəə́r mo fó ndzəv ye shoón rə́ne.

¹⁵Ku yiì, é la ndzə́ví yòʼ sùm mo. Ghár mo, fo m tó é kisə̀m. Sə́ mo, fo m sə́y áàŋkfəə́ wòŋ.

¹⁶Éè NYÙY TÀR, yú tóŋ yémé. Ku yù, mo à dzəə̀n e juŋ, din koŋ yé e wír vée. Bìnkìr e lèéy mo, bìʼ fo à yii kér mendzən e ŋàŋ.

¹⁷Lá à yòʼ lìtì sí yé fo ŋgaà wò lìm. M dzə̀ é ŋgeʼ, ku wìy cér, e sə̀ mo.

¹⁸Ku kòʼtí e mǒ ghaŋ, e sə̀ mo. Bòyìr mo fo aŋgaà vém vibàné.

¹⁹À kì liy se á shur mo shó. À kì woómé sém, aà kì nshoórsí wom. À kì aŋgaà vém vibàn adzə̀m.

²⁰Liy si kèr ne tím yém, a kém kí kù mày ne. Mò‑oò kiʼ vé kinshame, e làa yòʼ yen wír. Kiʼ ve á wáa njiysí mo, e làa yòʼ yen.

²¹Jìŋ gháʼ mo, á wíy a dzə̀ e ndzəʼ ji viyíkìr. Kilòŋ kém kí yúm, á fó kiŋkway ke melùʼ ji m nó.

²²Ku yiì, áwune lóo yi ŋkàʼ wóv, aá li a dzə̀ lòn. Ŋkàʼ sév sé cù si ku bìnkìr ji vitám vév.

²³Ku sə̀tí sí yéví, aá fir. Yìi, aá sén, e mày màyìn.

²⁴Dùŋrì dòʼshwiiy wò aáwune. Lì dòʼshwiíy wo à kérí, e jùm áwune, e koò.

²⁵Ndzəə̀r áwune, é láʼ sév sí kú a tiy e vifə̀m, é la wìr feyì yòʼ a shiíy sho.

²⁶Áwune ron wuú, taʼ e laàr wír ve wò‑oò màʼàn ŋgeʼ sho, sov vileémé vé wìr ve wò‑oò lemerin ne.

²⁷Dzə̀sì ŋgeʼ sév sí, yìmòʼ e yìmǒʼ kitu. Lá à yòʼ wìy lùŋèr áwune.

²⁸Yír yéví ku fəə̀ fəə́n fó ŋwàʼ wìr ve á wíy lùŋ. Lá à yòʼ tàtí áwune é ŋgoo wìr ve á ghvə́m wò.

²⁹Éè NYÙY TÀR, lùŋèr mo, e kìŋsìn mo. M dzə̀ ben, aá nəʼsì mo, a m dzə̀ é mvə̀m nyar.

³⁰M kù yíi a yòv luŋ, a burí yír Nyùy. M kù yíi a fo vibeerì, a koʼór yír rə́.

³¹Kí yíi bòŋ NYÙY TÀR, e shaà cu yee mbòŋ, kìn yee lúm nyàm wo wú kér loŋ wùn à mfay sií.

³²Wír ve á nəʼsì áwuneé kù yíi a yen, a sheʼrí. Ven ve vèn tiir a dzə̀ Nyùy fo mbìy, melív men mè yimkir.

³³NYÙY TÀR yii yú tóŋ aŋgàa ŋgeʼ. Wù yòʼ yii ŋwáy wír ve á dzəə̀n é sháŋ.

³⁴Yúv wùn à nsay kú a burí wun. Rìbà ndzə̀v wùn à vifá ve ví ghán sho vi kú a burí wun.

³⁵Nyùy wíy lùŋèr Sion, e nèn kfə̀n bàʼrì ntèʼ seé Juda. Wír vəə́ wíy a dzə sho, a ker nsay yee fó.

³⁶Wón wìr ve á ghvə́m wune wíy yi fó ji vitsə́ʼ vév. Rúrú, wír ve á koŋ yír Nyùyi kù wíy a dzə fo.