Read Lamnso Nsùyrì Nyùy 7 Bible Online

Nsùyrì Nyùy 7 - Lamnso bible

Nsùyrì Nyùy 7

¹[8] Éè NYÙY TÀR woo Nyùy wom, m kù lir a dzə̀ e wò sar. Bòyìr mo fo wír ve á jum mo ji á yúyrií, e fə̀ə́r mo fo áwuné wo,

²fo á sati mo, mo bvərə̀ʼ sàtì nyám, a sə̀ŋ, a dù sho, là wír wo wù sə́ mo.

³Éè NYÙY TÀR woo Nyùy wom, a fə̀m dzə̀ ji m yii kinyo ke bi kí e wìr, kìn ji m wày kiwó kém é kinyò ke bi kí,

⁴a m fə̀m fiìnè ŋkar yem e ŋgaà və vibàn, kìn ji m kùúy vifá ve ŋgaà wom vibàn kisáŋ,

⁵à kù yiì, áàŋgàa vibàn vémé jum mo, e koò, e dzə̀v mo, e màʼ fo nsay, e yùyrí, é dzə́n yémé wáa neŋ e kibvə̀r.

⁶Éè NYÙY TÀR, ku ŋàʼáy e wò dòʼshwiíy, e kìŋsìn mo fo aŋgàa vibàn vém ve á guutì moó. Éè Nyùy, à lèm ne kishiíy ke à wíy tinén nsaʼ wìr dzə̀m, ku ŋàʼáy, e sə̀ mo.

⁷Ku yiì, é vitúm vi báʼtí e wò ghaŋ, áà wáa dzə áwune kuy, a tsənsí sáʼ aáwune fó yuv.

⁸Éè NYÙY TÀR, kù tínen wò nsaʼ wìr dzə̀m, tínén yéem, e fòó mò, bìʼ fo vinyo vém ví dzəə̀n tìítiy, a bó m yòʼ kér kinyo kee kintéŋ.

⁹Ku ndzəə̀r liì kisaŋ wìr ve á méŋ wò, e tòm wír ve á yúnin wòo, aá tuúy. M mbaa wò woo Nyùy wo à yii yii kinyo ké réŋ, sayrì vifií vé wìr, à shilív shí.

¹⁰Nyùy dzə̀ ŋkeè wom, a wù luŋèr wír ve melív mev mè dzəə̀n tìítiy.

¹¹Nyùy dzə̀ taà saʼ woo réŋ, wù ban kinyo ke bi kí, sáʼ saʼán kishiíy kidzə̀m.

¹²A wír ve bií dzə̀ làa yòʼ bìnèr melív mev, bo Nyùy yíi baày nyùy rə rə̀r, a wù daà ne kinte kfə́, a dzə kibáʼtín mo wù lo, e màʼ mvən.

¹³Wù bàʼtí ne vifá və́ vé rər, a dzə̀ ve a ví kùm wír, wù kpù kpuún, e nàŋsín mvən sə́ se á naan.

¹⁴Rúrú, wìr wo wù méŋ Nyùy kwaʼtì a dzə̀ kinyo ke bi kí, rùn kighèʼ e wun bvə̀m, a kù fəə́ kimboʼtì fo wun shuù.

¹⁵Wù túŋ bií ji wìr gbu shó, a kù yíi gbù wun sho.

¹⁶Kighèʼ kfə́ kí lo, kí kù bìnkìr a dzə̀ e wun kitu, kinyo kfə́ kee ji wìr kpú kí nèn kfə̀n gbù a dzə̀ e wun kitu.

¹⁷M yíi a beèrì NYÙY TÀR, bìʼ fo wù yii yii kinyo kfə́ tìítiy, a m yíi a yòv, a burí yír NYÙY TÀR woo Taà Vitu.