Read Lamnso Nsùyrì Nyùy 71 Bible Online

Nsùyrì Nyùy 71 - Lamnso bible

Nsùyrì Nyùy 71

¹Éè NYÙY TÀR, m kù lir a dzə̀ e wò wùn. Lá à yòʼ màʼày mo, é m wáa woomé.

²Sə́ mo, e bòyìr mo bìʼ yii yé ye réŋé. Yú tóŋ yémé, e lùŋèr mo.

³Kú a dzə kirùmèn kém ké nsàm, a dzə moo lav ye á bomen e tíyí, yì wáa kìŋsìn mo. Rúrú, à dzə̀ kilán kém, a dzə kikiŋ kém ke tavín kí.

⁴Éè Nyùy wom, fəə́r mo fo wír ve á méŋ wòó kiwo. Bòyìr mo fo wír ve bi ve á táy mo là mendzəne.

⁵Rúrú, NYÙY TÀR, vifií vém ví kù tíy a dzə̀ e wò wùn, a m kù‑uù sí tiir shilív e wò wùn, e kèʼ fo meterí.

⁶Kèʼ mo vé‑eè dzəən mo, m kù yéʼti a dzə̀ e wò wùn. Dzə̀ wò wo wò‑oò fəərin mo fo yè wór bvə̀m.

⁷À dzə̀ kikiŋ kém ke tavín kí, a wíri leey dzə̀ʼə̀m yém, kér gháʼ.

⁸M búri wò ghán sidzə̀m. A m fiʼtì vikuʼùy vé ghán sidzə̀m.

⁹Yii bèy lèn, mo m dzə̀nèn ne bèn, lá à yòʼ tsə̀ʼ mo tsə́ʼən é bàm. Mo vitaáví ví sí weʼ fo mǒ wùn wéʼen, kii wò, lá à yòʼ màʼày mo.

¹⁰Leéy ri, aŋgaà vém vibàné sí wóŋ mo wóŋén. Á ron wúu yém, kár menàŋ ji á yúyrí mo.

¹¹Áwune suuy jii, «Nyùy bìn ne ndzə̀m e wun, vèsən jum, e koò, wìr wóo sə wun yòʼ dzə̀.»

¹²Éè Nyùy, lá à yòʼ a leéy mo leeyín. Éè Nyùy wom, ku wìy cér, e sə̀ mo.

¹³Ku màʼ wír ve á tóy vinyo e mǒ bàmé máʼan, aá woómé. Woómé si ku sùm wír ve á leey ji m lémé súmen.

¹⁴Fo kém kí, m kù yíi a kìʼ a dzə̀ wò ghán sidzə̀m. M kù yíi a burí wò, a dù duùn fó mbìy.

¹⁵M yíi a fèr vinyo ve juŋ ve à yii. M yíi a fèr ghán sidzə̀m mo à luŋèr wír vé. Vinyo vé vi dzə̀, a bó yòʼ dzə̀ m kìíy móo fìʼ.

¹⁶Éè NYÙY TÀR wò woo Taà Ndzə, m yíi a fèr lim sé se ghaʼtín sí, a fìʼtì vinyo ve juŋ ve à yii, vinyo ve dzə̀ kù yiì wò cáʼ.

¹⁷Éè Nyùy, à mèrìr ne mo, e kèʼ fo meterí, a m kù dzə́, fiʼtì viŋgaʼnìn ve vinyò ve à yii.

¹⁸Éè Nyùy, lèn mo m dzə̀nèn ne, kitú ki fə́r, lá à yòʼ màʼày mo máʼayin. Kú a dzə wòsò, é m wáa fìʼtì vinyo vé ve ghaʼtín ví, a fìʼtì e ŋgwàʼ se sí wiy fo bàm sí.

¹⁹Vinyo vé ve juŋ vi dzə̀, a ví yénsinè. Ví yénsinè, du, mee e ntoò yùv. À yiì ne viŋgaʼnìn ve vinyò. Feyì feyì, Nyùy, dzə̀ la moo wò?

²⁰Mo à fə̀m‑eè yiìn, m yén ŋgeʼ sinín, ŋgeʼ, a dzə̀ se sí meen é ŋgeʼ, à kù kfə̀n dzəə́ yìi siìr mo é vijùŋ. À wíy taŋ mo fo kpúu,

²¹e dzə̀sì viwìr vém. À kfə̀n wíy rəə̀r shilív shém.

²²Ábáy, Nyùy wom, m kù yíi a burí wò e lúŋ nshìí. M yíi a burí wò, bìʼ fo à yii tíy vèn à wír vée. Wò woo Ŋgaà wo Ranén woó Isray, m yíi a kùm lúŋ, a yòv, a burí wò.

²³M yíi a waamé yòv, a sheʼrí. M yíi a yòv, a burí wò. M yíi a yòv, bìʼ fo à lùŋèrìn mo.

²⁴M yíi a fìʼtì ghán sidzə̀m kinyo ke juŋ ke à yiìn e mò. À màʼ ne wír ve á taʼ, e lemér mo, e yiì, á wáa woomé.