Read Lamnso Nsùyrì Nyùy 72 Bible Online

Nsùyrì Nyùy 72 - Lamnso bible

Nsùyrì Nyùy 72

¹[84] Éè Nyùy, ku fò fon vifií, é wù wáa tinén vinyo e nsànloŋ. Ku fò, é wù wáa saʼ woŋ kijuŋ.

²Ku yiì, é wù wáa saʼ wír vé e dzəə ye juŋ, a tinén nsaʼ aghéʼncey é nsànloŋ.

³Ku yiì, é nsay fó wíri vifá ve juŋ vi nyanyày, é wóŋe wáa dzə ji dèʼ bìʼ sáʼ ye juŋe.

⁴Ku yiì, é fòn kiŋsin wír ve á nyavrì sho, e sə̀ ve á dzəə̀n é kibuŋ ke vifa, e laàr wír ve á bvə́ʼti ghay wíri.

⁵Éè Nyùy, wíri kú a ghvəm wò e ŋgwàʼ sí ŋgwàʼ si. Á kú a ghvəm wò, e dù, e meé mo shùy wíy ban, a ghvəm, e dù, e meé mo ŋwee wíy ban, e dù, e jòʼsì.

⁶Sáʼ fòne ku sə̀ wíri. Yí ku sə̀ wíri moo wuú ye yí ló, ló, a vifa vi kúyí, cuurì, a nsay rə.

⁷Yii ye juŋe ku tèʼ e wun ghan, é nyaáŋ wáa dzə, e dù, e jòʼsì.

⁸Sáʼ rəə́ ku wìy kèʼ fo kintoshùy, e dù, e mèé e kintoŋrìshùy. Yí ku wìy kèʼ fo màndzə̀v woo Yufret, e dù, e mèé e ndzəywoŋ.

⁹Vitúm veé woʼ ví ku wìy a wìy, a tsəm ndzəə́ e wun si, áàŋgaà və́ vibàné wáa gbù e wun si, a neŋ e kibvə̀r.

¹⁰Afone kú a wìy, a fo nshwì e wun. Veé Tarshishi kú a wìy e nshwìí, à veé wòŋ seé mvə̀m rìbà ndzə̀v sí, é veé Sheba wùn à veé Sebàa wáa wìy aàfómo véví.

¹¹Afon adzə̀me kú a dzə e wun sar saʼ, é wìr dzə̀m woó kitu ke nsay wáa lìm fo wun.

¹²Wù yú tóŋ wìr ve á mbaa wun, fəər aghéʼncey fó ŋgeʼ. Wù sə́ wír wo á nyavrì sho, wír, a bó wù yòʼ kér ŋgaà sə.

¹³Wù shám wír ve á nyavrì sho, tín dzəʼə̀m yév fo kpúu.

¹⁴Wù sə́ ghéʼncey fo wír ve á nəʼsì wune, kiŋsìn njoó fo wír ve á taʼ, e lemér wune. Dzəʼə̀m yéví dzə̀ é shií féyì fo wun.

¹⁵Fòn ku sàʼ ntàmda. Á ku fò *kisha ke mbàm ke baar kí shó. Á kú a lon Nyùy bìʼ wun kishiíy kidzə̀m. Nyùy kú a səə̀vì wun ghán sidzə̀m.

¹⁶Vifá ve yi vi kú a rə̀ŋsìn virə́ʼ vidzə̀m. Ví kú a fàmtìn fàmtìn é vitu ve agwan, é vicí ví kú a koóm moo veé Gwan Lebanon. Wíri kú a run e mvəm sé laʼ, a run mo jíyí sùm virə́ʼ vé kwaʼ.

¹⁷Yír fòne kú a tiy fo ghán sidzə̀m, é leŋ vəə́ kú a dù duùn, mo woŋe wíy mày. Wíri kù wíy a lon kisəəvì fo Nyùy, a dzə̀ ke wù‑uù səə̀vìn fon sho, a vitúm vidzə̀m vi wíy a yòŋ wun ji ŋgaà mbùʼmé.

¹⁸Búríi wáa dzə fo NYÙY TÀR woo Nyùy wìr veé Isray. Jòʼsì wun wo wù yii viŋgaʼnìn ve vinyò.

¹⁹Á wáa burí yír rə́ ghán sidzə̀m. Vikuʼùy və́ ví ku rùn kitú ke nsay. Amen, Amen.

²⁰Bunrì se Davir woo wan Jessi si mày ne.