Read Lamnso Nsùyrì Nyùy 73 Bible Online

Nsùyrì Nyùy 73 - Lamnso bible

Nsùyrì Nyùy 73

¹[85] Rúrú, Nyùy kér wír veé Isray kijuŋ, wír adzə̀m ve á jumrì wun shilív shimòʼón.

²Yii bèy, a mò‑oò bèr shishàr fóo fəə́r vifií vém fó wùn wó. Mò‑oò sí tín kiwuú fó bàm wó,

³bìʼ fo mò‑oò loòn ne, a siimé vé kiŋkoʼòrwùné, a m yén ne, a kéŋ wìr ve á méŋ Nyùyi kúyí.

⁴Bó áwune yòʼ katìrì, á bon vifá, foóme, kiʼ atávkín.

⁵Áwune yòʼ yén ŋgeʼ se wíri yén sìn, bó yàsí yòʼ kar áwune moo wír ámóʼó.

⁶Á lì ne kiŋkoʼòrwùn, e wày é wùn moo vifá veé kilòŋ. Áwune lì ne melaà e wùn ji ndzə̀y sév.

⁷Kù fəə́ kinyo ke bi kí fo áwuné meliv.[86] Yii ye bií sə̀ ne melív mev medzə̀m.

⁸Á shéʼ wíri, suuy vinyo ve bi ví, kóʼor wún, bá antaŋ ji á nəʼsi wíri.

⁹Á yoŋ vinyo ve bi ví e Nyùy bàm, ghán, raʼsì wún woŋ e dzə̀m.

¹⁰Bìʼ bey, wíri kù gbu gbuùn aáwuné si, yuúri shuu wóv, kù mo á nó a dzə̀ mendzə́v.[87]

¹¹Wír vìne maʼ lám jii, «Nyùy kì ka a?» Wun woo Taà Vitu kér vifií a?

¹²Á mo wír ve á méŋ Nyùyi dzəə̀n kév bey. Á dzə́, a bó á yòʼ cí kinyo, a kéŋ yéví kù kúy kuyín.

¹³Fəə́r ye mò‑oò fəərin vinyo ve bi ví fo mǒ shiliví lày kisáŋ, a su ye mò‑oò suùn njò yem, a dzə là shilóme kù lày kisáŋ.

¹⁴Éè mǒ Nyùy, m kù yén ŋgeʼ mo kishiíy kí dzəə̀n, à kù maʼ ŋgeʼ e mò vijàvndzə vidzə̀m.

¹⁵A mò‑oò bóo suúy kinyo ke mò‑oò kwaʼtì ji m suuyì, bo mò‑oò jàv ne ŋgoo vèr à ŋgwàʼ yè.

¹⁶M lóo rə̀m mo dzə̀ m kìíy kinyo kìn, lóo rə̀m, kí wàa ghaʼ mo ghaʼán.

¹⁷M kù‑úù du e Nyùy lav, e bóo kiíy mo kimaysì ké wìr vìy ki dzəə̀n.

¹⁸Rúrú, à shèmér ne áwune é dzəə se sí lerìrì. À lo, à yiì, áwune gbùkìr, e mày màyìn ŋkuuŋkùŋ.

¹⁹Yén ri, mo áwune lo, á gbù fó tèr, lòné koò áwune, á kpù kpú mensəə.

²⁰Áwune sì moo njèm ye yì shiin wír, wù yímén, e kù nèn mèŋ méŋén. Rúrú, NYÙY TÀR, à yíi tumnín ké, e meŋ áwune méŋén ji vinjeenjèm.

²¹Yì‑iì dzə̀, a m dzəə́ yú a dzə̀ nyár wír vìn, a shilív shí koó mo mo á sòv sòvìn,

²²mò‑oò dzə̀ kiyúŋ, méŋ dzə́ə sé meŋén, guutì wò e njà nyàm kwaʼ.

²³Yii bèy, m dzə́ wòsò ghán sidzə̀m, aà kù kér mo e wò kiwo.

²⁴Kú a dànèr mo e ntir sé si, wíy lóo dzə fo bàm, áà buʼ mo e vikuʼùy ví.

²⁵NYÙY TÀR, m kfə̀n kér la é yuv, e shaà wò? M yòʼ siíme kifá kímóʼ kí é nsay, e kfə̀n shaà wò.

²⁶A wún wómé fə̀m njoó, bo Nyùy kù dzə̀ kóy wóm wo tavíné. Wù kù dzə̀ vitsə́ʼ vém, e dù, e jòʼsì.

²⁷Rúrú, wír ve á méŋ wòo kù wíy lày. À kù wíy laàr wír ve á bóʼti wò adzə̀m.

²⁸Fo kém kí, kù ghèén ji m wáa dzə vèr Nyùy. NYÙY TÀR sì kirə́ʼ kém ké kilìr, Nyùy, a dzə̀ wun woo Taà Ndzə, a m yíi a fìʼtì lim se wù yii sidzə̀m.