Read Lamnso Nsùyrì Nyùy 74 Bible Online

Nsùyrì Nyùy 74 - Lamnso bible

Nsùyrì Nyùy 74

¹[88] Éè Nyùy, à màʼày ver ŋkuuŋkùŋ bèn ji ka? À kù yíi a shwiíy kilòŋ vèn à wír vée, e dù, e jòʼsì à?

²Kuúmé wír vé ve wò‑oò tayin ne fo yàŋgùʼú, e tìn fó vikwàn ji wáa dzə kitúm ké. Kuúmé Gwan Sion fo wò‑oò dzə̀ʼə̀mèn ne.

³Ku kòʼ, e yèn búʼú, aŋgàa vibàné bìvír ne kifá kidzə̀m keé lav cù.

⁴Aŋgaà vé vibàné‑eè yòv nsiì e wò lav cù, e tùy cícíwàr wóv fó ji á sò á ne.

⁵Vé‑eè dzə̀ moo wír ve á duùn é kòv, wír ve á duùn, a gwàr vicí e njàm sí.

⁶Vé‑eè bvə̀ʼə́y vifá ve semén ví veé lav cù vidzə̀m. Vé‑eè sánri e njàm sí, bvə́ʼəy e vibur vi.

⁷Vé‑eè tòn lav yè cù, yì gbú é nsay, e bìvír kirə́ʼ ké ke dzə.

⁸Vé‑eè sév ji á kù yíi bvəʼə́y a ver ŋkuuŋkùŋ, e nèn tònrì virə́ʼ ve vèr yii cu Nyùy sho vidzə̀m.

⁹Vèr yòʼ dzəə́ yén visəəm vé vitaaví vé Nyùy. Aŋgàa ntum Nyùyi mày ne rú, a bó wìr fo vèsən yòʼ kfə̀n kì mo kí yíi dù, e jòʼsì.

¹⁰Éè NYÙY TÀR, aŋgàa vibàné wíy sheʼ wò, e dù, e meé e le? Á kù yíi a bivír yír yé, e dù, e jòʼsì à?

¹¹À tèn fóo ràmsì kóy wó, e sə ver bìʼ ka? Ku ràmsì kóy wó yìyí, e laàr áwune.

¹²Rúrú, Nyùy, kù dzə̀ wò fon wom, e kèʼ fo yàŋgùʼ, wò wo à sə́ ver fo aŋgaà vér vibàné.

¹³Yì‑iì jàvsìn wò rìbà ndzə̀v e vitaáví vé vi. Wò‑oò bèʼtí vitú ve vigàgǎʼsòŋ veé mvə̀m sé ndzəv.

¹⁴Kù‑uù bvə̀ʼə́y wò vitú ve kigàgǎʼsòŋ kee Leviyatan,[89] e fò ji viyíkìr ve vifa ve ví shiiy e woʼ.[90]

¹⁵Wò‑oò yiì, ntòŋ sé ndzəv sí mvə́ʼkír, mewón me ndzə̀v mè fəə́kír, e kfə̀n lò, e yiì, ndzə́v se kuʼkìn sí yúmkír yumkín.

¹⁶Shùy wùn à vitsə́ʼ ví kù dzə̀ vé. Kù‑uù tùúy wò shúy wùn à ŋwee.

¹⁷Yì‑iì sìysì wò bìíy se ndzə sidzə̀m, a kù‑uù lèm wò bìŋ wùn à lùm.

¹⁸Éè NYÙY TÀR, kuúmé mo aŋgaà vé vibàné shéʼ wò, a viyúŋ vé wìr vi bívir yír yé.

¹⁹Lá à yòʼ màʼtì dzəʼə̀m alàntom e vé vibàné wo. Lá à yòʼ bùʼúr, á sí nəʼsì wír vé, taʼ, e laàr dzəʼə̀m yév.

²⁰Kú a kuumé *mensaŋ me wò‑oò gwàrìn vèsən mè, bìʼ fo melaà mè runen ne e wòŋ. Mè kù rùn ne virə́ʼ ve sənér ví vidzə̀m.

²¹Lá à yòʼ màʼtì, é woómé si sum ansòvkìtu vìn. Ku yiì, áàŋgàa kitàn wùn aàghéʼncey víne wáa burí wò.

²²Éè Nyùy, ŋáʼáy, e dìn kóy wó wo tavíné. Kuúmé mo viyúŋ ví shéʼ wò vishiíy vidzə̀m.

²³Lá à yòʼ bùʼúr fo kiyòr ke aŋgaà vé vibàné yorì, à fó njèʼèr wìr ve á tsə́y kóy vèn áwune. Njèʼèr wov kù kúy kuyín ghán sidzə̀m.