Read Lamnso Nsùyrì Nyùy 75 Bible Online

Nsùyrì Nyùy 75 - Lamnso bible

Nsùyrì Nyùy 75

¹[91] Éè Nyùy, vèr fó vibeerì e wò. Vèr beerì wò feyì, bìʼ fo à dzəə̀n e věr mentsə̀m. Wìr dzə̀m kù fiʼtì viŋgaʼnìn vé ve vinyò ve à yiìn.

²Nyùy suuy jii, «Ghán se m lèmèn ne si wíy gheén é m tínén nsaʼ a dzə̀ é nsànloŋ.

³A kitú ke nsay ki fə̀m lò, a sə̀ʼ, à kifá kidzə̀m ke kí dzəə̀n shó ki, bo mómò, bo m kù‑úù yii, é vitóm və́ ví wáa tiy ji ŋkǐŋ.

⁴M suuy e vé kinsùmrìwùné jii, ‹Lá vèn yòʼ dzə́ə a sùmrì wún.› M suúy e ve á méŋ moó jii, ‹Lá vèn yòʼ dzə́ə a koʼnín.

⁵Lá vén yòʼ dzə́ə a ŋàʼnìn. Lá vèn yòʼ dzə́ə a jàʼrì e kisuŋnìn.› »

⁶Bó gháy wìri yòʼ yii lo fo wír ve á tóm wune, kìn dzə̀ veé mbìv yee fo shùy yii tó, kìn veé mbìv yee fo yì yii nəə, kìn dzə̀ veé wòŋ woʼó.

⁷Kù mày Nyùy wo wù yii tínen nsaʼ, baʼ wír ámóʼó é nsay, nan ámóʼó é yuv.

⁸NYÙY TÀR kér bàr e wun kiwo, a *meluʼ me tavkín mè fəʼə̀, rún bàr və̀n, a mè din a dzə̀ dòʼshwíiy və. Wù cutì ji wír ve á méŋ wun adzə̀me nó, á nò ben, à kidzə́ŋ kí shó.

⁹Yii bèy, m yíi a sheʼrí kém sheʼrín, e dù, e jòʼsì, m yíi a yòv, a burí Nyùy wo Jakov‑iì ghvə́mé.

¹⁰NYÙY TÀR wíy laàr vitaáví vé wìr ve á méŋ wun vidzə̀m. Yii bèy, wù wíy dzə̀sì vé wìr ve á yúnin wun dzə́sin.