Read Lamnso Nsùyrì Nyùy 77 Bible Online

Nsùyrì Nyùy 77 - Lamnso bible

Nsùyrì Nyùy 77

¹[93] M tóŋ kitávín e Nyùy bìʼ kíghàʼ wom, tóŋ kitávín e wun ji wù ku yù á tóŋ yém.

²M lóo dzə e mvə̀m ŋgeʼ, m kù a leéy a dzə̀ Nyùy. M lo, m nàn wó yém é yuv, a bùnrì, a bùnrì vitsə́ʼ vifur, là dór, a bó kifá ki yòʼ rəər shilív shém.

³M lóo kuumé Nyùy, m kù a shwem shwemén, lóo gwàrìr kinyo kfə́, wúné wàa seèmè mo séemen.

⁴À yiì ne, mbuùné sí káŋ fo mǒ si. M sì ŋgeʼ ŋgeʼ, là kinyo kée kfə̀n suúy.

⁵M lo, m wàa kuumé ghán sé mbìy si, a gwàrìr mo vinyo vi‑iì dzəə̀n fó ŋgùʼ.

⁶Lóo dzə vitsə́ʼə́, m wàa rə̀m a dzə̀ ndzə. Lóo kwàʼtì vinyo, m wàa ghay jii,

⁷«NYÙY TÀR kù wíy màʼày ver ŋkuuŋkùŋ à? Wù yòʼ kfə̀n dzəə́ wìy sham ver a?

⁸Wù yòʼ kfə̀n dzəə́ wìy dìn koŋ rə́ e wír vəə́ gheéy a? Dzə̀ ji bó wù yòʼ dzəə́ wìy yiì vinyo ve wù‑uù kàʼàn ver shó à?

⁹Dzə̀ ji Nyùy làysìn ne fó a sham mendzən mer a? Wù shwìíy ne kilòŋ, la kitú ki yòʼ dzə́ə a lùm wun bìʼ ver a?»

¹⁰Á bèy, m nen sùúy kém ji nyár yémé dzə̀ á jii, Taà Vitu yòʼ dzəə́ li kilíŋ kér, yíi a vinyo.

¹¹Éè NYÙY TÀR, m yíi a kuumé lim sé se ghaʼtín sí, rúrú, a kuumé viŋgaʼnìn vé ve vinyò vee fó yàŋgùʼ.

¹²M yíi a kwàʼtì kùm lim yé e dzə̀m ye à lìmèn, rúrú, a kuumé viŋgaʼnìn ve vinyò ve à yiìn.

¹³Rúrú, Nyùy, à dzə̀ e ránén, a kinyo kidzə̀m ke à yii ki dzə̀ là jay. Nyùy wo wù dzəə̀n e gháʼtín moo wò dzə̀ vəné?

¹⁴À dzə̀ Nyùy wo à yii viŋgaʼnìn ve vinyò, din vitaáví vé e vitúm ví mvəm.

¹⁵Wò‑oò lùŋèr wír vé e vitaáví vé vi, wír vé vee rám Jakov wùn à yé Joosevi.

¹⁶Rúrú, Nyùy, wò‑oò dìn kitú ké e ndzəv, rìbà ndzə̀v wáa sə̀ʼsì fo loònsay, kù mo yaʼ wír wo wù fan fan.

¹⁷Mbàʼ yií, wuú wáa cuùrì fo yuv, kishèv ki wáa bàvkìr mbìv sé ndzə sidzə̀m, a baykír, a dzə̀mkìr fo yuv.

¹⁸Kishèv ke wò‑oò tsənsin kí wáa wamkír fo yuv, a njàʼàm, a kàʼày kitú ke nsay kidzə̀m, a nsay səʼsì, yaʼà, mo fan wír kifá.

¹⁹Tuúmé yée wáa dzə a dzə̀ é rìbà ndzə̀v fo ŋkiʼ dzəə̀n, a kiwuú ké ke dzəə kí tóʼnin a dzə̀ ndzə́v ye wiyí, a bó yòʼ‑oò dzə̀ wìr yèn kitooshì ké.

²⁰À wáa dànèr wír vé mo nshìy dànèr ŋgoo njiì, aà wáy a dzə̀ e Mooser wùn Aaron kiwo.