Read Lamnso Nsùyrì Nyùy 78 Bible Online

Nsùyrì Nyùy 78 - Lamnso bible

Nsùyrì Nyùy 78

¹[94] Éè wìr vem, vèn yuúrí kinyo ke m yéʼey ven shó ki, vèn fó vituʼùr ví, e yuùrí jí sém sí.

²M lo, a fèr vinyo, a yòv a dzə̀ é ŋgàn, a suúy vinyo ve ŋgùʼ ví ve ví kér kilìtì,

³vinyo ve vèr‑iì yuun ne, e kìíy, vinyo ve atàr vérí‑iì fèrìn e vèr.

⁴Vèr yòʼ wíy a lìtì vinyo vìn fo wón vérí. Vèr kù wíy a fèr e ŋgwàʼ ye yì wíy a koʼ, vinyo ve juŋ ve NYÙY TÀR yiìn, a fèr vitaáví və́, à viŋgaʼnìn ve vinyò ve wù yiìn ví.

⁵Wù‑uù fò kinyo ke *mensàŋ mvə e rám Jakovi, e tùúy yéʼéy rə́ é Isray. Wù fó sáʼ aàtàr vesəné ji á wáa yeʼéy a wón vév shó,

⁶é ŋgwàʼ ye yì kóʼó fiʼ kìíy, à wón ve á dzəə́ wìy a dzəə́ fo bàmé, aáwune wìy a lì sa kinyo kìn, a yeʼéy sa wón vév shó.

⁷Á kiiyì, aá ku nèn a tiír vifií e Nyùy wùn, a kuumé lim sə́, a yunín nsər sə́ ghán sidzə̀m,

⁸é la á yòʼ dzəə wìy a dzə moo atàr vév. Vé‑eè táv kitú, tsə́y kóy wùn à Nyùy, ŋgwàʼ ye bó yì yòʼ‑oò wáy shilív e Nyùy wùn ŋkuuŋkùŋ, a bó yì yòʼ tíy e Nyùy wùn shilív shimòʼón.

⁹Vé rər vee Efrayim ramé‑eè kér vinte wùn à mvən si, e kfə̀n a nyeŋ e kishiíy ké rər.

¹⁰Áwune yòʼ‑oò ló a lèm mensaŋ me Nyùy‑iì gwàrìn wùn áwune. Á kù‑uù tèn fó a ghan mo Ŋwàʼ Nsər Nyùyi dinè.

¹¹Vé‑eè làysìn vinyo ve Nyùy‑iì yiìn, laysìn viŋgaʼnìn ve vinyò ve wù‑uù dìnèn aáwune.

¹²Wù‑uù yii viŋgaʼnìn ve vinyò, aàtàr véví yéné. Wù‑uù yii e nsay Tsoan, e wòŋ woo Ejiv.

¹³Wù‑uù tòʼnín rìbà ndzə̀v, dzəə̀ fəə́sín, áwune shaà sho, a wù yií ne, ndzə́ví wáa tiy moo virə́v vé lav bèy mbìv sibaà.

¹⁴Yì‑iì lóo dzə e shùy, Nyùy yiì, mbàʼ wàa dù fo mbìy, a dànèr áwune, lóo dzə vitsə́ʼə́ vidzə̀m, və́yí wàa baarí, a dù fo mbìy, a dànèr áwune.

¹⁵Wù‑uù sàn vilán e kirə̀ʼ ké woʼ kí, e fò áwune mendzə́v nyanyày moo rìbà ndzə̀v, á wáa no.

¹⁶Wù yiì, ndzə́v sí wáa fəə fo kilan, a leŋ moo ndzə́v se kuʼkìn sí.

¹⁷Yii bèy, áwune kú a yiì vinyo ve bi ví e Nyùy, kù tsə́y a dzə̀ kóy wùn à Nyùy woo Taà Vitu e woʼ.

¹⁸Áwune‑eè mum Nyùy e kúmé, táv ji wù fó á vifá ve yi ve vé‑eè diyì.

¹⁹Áwune‑eè súŋnin kibí e Nyùy bàm jii, «Kù yòʼ dzə̀ Nyùy fò ver viyíkìr e woʼ fen a?

²⁰Dzə̀ rú, wù‑uù lo sàn kilán, mendzə́v mè wáa mee fo fo, a leŋ ji ndzə́v se kuʼkìn sí, yii bèy, a dzə̀ wù fò rú viyíkìr e wír vəə́ á? A dzə̀ wù fò ver nyám a?»

²¹NYÙY TÀR yú kee shooy, wúné kìn wun, wù màʼ və́y e rám Jakoví kitu. Wù kú a shwiíy kilòŋ wùn à wír veé Israyi,

²²bìʼ fo á yòʼ‑oò wáy shilív e Nyùy wùn, a bó á yòʼ‑oò biíme ji wù kér a vitaáví vée lùŋèr áwune.

²³Yii bèy, wù wám mbàʼ seé yuv, sí mvə́ʼ shuu,

²⁴wù cuúrí vifá ve yi fo yuv, aá yoŋ ji *manna. Wù‑uù fò áwune vifá ve yi ve ví lo a dzə̀ fó yuv.

²⁵Áwune yí vifá ve yi ve yii yí nsheèlav se Nyùy. Nyùy ku nèn a fo áwune vifá ve yi nyanyày.

²⁶Nyùy kfən yiì, shwér woo fo shùy yii tóo wáa shaà e yuv. Wù kfən sə̀ŋ woo fó tsən e vitaáví və́ ví, wú wáa koʼ.

²⁷Wù cuùrì nyám fo áwune‑eè dzəə̀n, yì wáa dzə nyanyày moo kibvər, a dzə̀ ji wù‑uù tsə̀nsí menə́n nyanyày moo síy seé rìbà ndzə̀v,

²⁸mè gbú fo áwune‑eè bee, e rùn shweésí wóv e dzə̀m.

²⁹Wìr dzə̀m yíkír, e kùr, a Nyùy fó ne áwune vifá ve yi ve vé‑eè diyì.

³⁰Mo á yíkirì, aá kù dzəə́ kér vifá ve yi e wo, a bó bvə́me yóʼ ne kùr,

³¹dòʼshwiiy Nyùy ŋáʼáy bìʼ áwune. Wù laàr antav vév, e sèn vitaáví vé wónlě nsùm veé Isray.

³²Fə̀m mo Nyùy‑iì yiìn vinyo vìn, áwune kú a bùʼtì vinyo ve bi ví. Fə̀m mo wù‑uù yiìn viŋgaʼnìn ve vinyò, á ku tèn fóo way shilív e wun wùn.

³³Á bèy, Nyùy nèn fèér dzəʼə̀m yév, yí shaá moo shwér, wù túm ŋgeʼ si, sí kuúy áwune, aá kpúkirì.

³⁴Nyùy‑iì yúyri ámóʼó, kibér ki nèn a bìnkìr, a tàʼ Nyùy shilív shidzə̀m, a kfən e wun wùn.

³⁵Áwune‑eè kuúme ji kù dzə̀ á Nyùy wo dzəə̀n kikiŋ kév, a dzə̀ wun woo Taà Vitu wo dzəə̀n ŋgaà lùŋèr wov.

³⁶Yii bèy, áwune‑eè laarì wun láarin, bóʼti wun e jí sév sí.

³⁷Melív mev mè yòʼ‑oò ló a tiy e wun wùn, aá yòʼ‑oò ló a tiy rú é mensàŋ me Nyùy‑iì gwàrìn wùn áwune.

³⁸Yii bèy, e yé ŋgaà mendzə̀ne, wù ku làysìn vinyo vév ve bi ví, e làa yòʼ laàr áwune. Mo dòʼshwiíy kù kív wun, a wù kfə́men à fó à fó, wù kú a sə̀r dòʼshwíiy və sə́rin, fóo laàr áwune adzə̀m.

³⁹Wù kù‑uù kuúme ji áwune dzə̀ kév á wíri, aá kù wíy kpu, aá dzə̀ moo shwér wo wú shaa shaàn, a bó yòʼ dzə̀ wú kfə̀n kfə̀n é bàm.

⁴⁰A dzə̀ kìíy la mo áwune‑eè tsə́y kóy wùn à Nyùy e woʼ, nyárir shilív sə́ fó e ghan fóo fèy?

⁴¹Áwune‑eè mum wun à fó à fó, nyárir shilív shé wun woo Ŋgaà wo Ranén woó Isray.

⁴²Áwune yòʼ fə̀m‑eè dzəə́ kuúme mo vitaáví və́ ví dzəə̀n, vitaáví ve wù‑uù dìnèn é kishiíy ke wù‑uù fəərin áwune fo aŋgaà vév vibàné wo.

⁴³Wù‑uù yiì viŋgaʼnìn ve vinyò, e nsay Tsoan, e wòŋ woo Ejiv.

⁴⁴Wù‑uù bìnèr ndzə́v sé wìr veé Ejiv, sí kfə́n é mensə, la áwune yòʼ dzə́ə a ker mendzə́v mé a no.

⁴⁵Wù‑uù tsə̀nsí mebvə́m, mè wáa fo ŋgeʼ aáwune, e kfə̀n tsə̀nsí vishàm ve ví‑iì bívir nsay e dzə̀m.

⁴⁶Wù‑uù tsə̀nsí ŋguùmé, sí gbù, e laàr kifá kidzə̀m ke vé‑eè lìmèn é sum.

⁴⁷Wù‑uù yiì, mentíy mè gbù, e kìvtí vitiír vév vé *vayin, e yiì, kintòn ki yúy vicí vév vé *sikamor.

⁴⁸Wù‑uù yiì, mentíy mè gbù, e yùyrí anàʼ vév, e kfə̀n tùm kishèv, kí dzə̀v njiì wov.

⁴⁹Wù‑uù shwìíy kilòŋ wùn áwune é ŋàŋ, e yiì, á yútí, e yù mo dòʼshwíiy və koó. Wù báʼtí ŋgeʼ ye biibí, e màʼ aáwuné wùn, yì wìy moo nsheèlav se Nyùy se sí loòn ntum ji sí li áwune, e lì, e dù laàr e kisəə.

⁵⁰Wù yòʼ‑oò ló a sə̀r dòʼshwíiy və, a bó wù yòʼ‑oò lo kìm áwune fo kpúu, bìʼ bey, wù nèn màʼ kifə̀ʼ aáwuné kitu.

⁵¹Wù‑uù yùyrí wón mbìyi veé Ejiv adzə̀m, wón mbìy vee vilume kpú fó ram Ham adzə̀m.

⁵²Á bèy, wù nèn lì wír və́, e fəə̀ shó mo wìr tsəə̀né njiì, a dànèr áwune, a tosín wóʼ shó.

⁵³Wù‑uù kiŋsìn áwune é mbòómbòŋ, la áwune yòʼ dzə́ə a fàn kifá. Yii bèy, ké aŋgaà vév vibàn, ndzə́ví leér áwune leerín.

⁵⁴Wù nèn lì áwune, e nə̀ə́ sho e wòŋ wo wù shavin ji və́, a dzə̀ gwan wo wù‑uù koon e vitaáví və́ ví.

⁵⁵Wír vəə́‑əə̀ nəə e nsay foo fèy, a wù jum vitúm ve ví‑iì sí dzə́ fo. Á nəə́, wù jàv virə́ʼ aáwune mo rám sév sí‑iì dzəə̀n, e nèn fò láʼ se vitum vìy, á wáa dzə sho.

⁵⁶Yii bèy, áwune kú a mùm Nyùy woo Taà Vitu, a tsəy kóy wùn áwune, e làa yòʼ a yunín vinyo ve wù‑uù foon.

⁵⁷Áwune‑eè bìn ndzə̀m e Nyùy, e màʼày wun réŋréŋ mo atàr véví‑iì yiìn, a dzə moo kinte kee bòŋ fó si.

⁵⁸Áwune‑eè cu anyùy kisaŋe, tínsin Nyùy, yii, a kilòŋ kfə́ kí shwiiyì bìʼ mebvə̀m mev.

⁵⁹Nyùy yén kinyo kìn, dòʼshwiíy kú a kiv wun kivín, wù nèn kù mèŋ wír veé Isray ŋkuuŋkùŋ.

⁶⁰Wù méŋ kirə́ʼ ke vé‑eè cu wun sho e Shilo, a dzə̀ kibàn ke wù‑uù dzə́ sho e wír vəə́ mvəm,

⁶¹e màʼtì, aŋgaà vév vibàné faásí ŋkùv mensàŋ, kisəəm ke kí din vijuŋ wùn à vitaáví və́ kí láy fó wòŋ.

⁶²Wù‑uù dìn dòʼshwíiy və e wír vəə́, e màʼtì, á yúyrí áwune é shùu rər.

⁶³Vé‑eè yùyrí wónlě nsùm veé Isray, wónlě ŋgòne búŋ alúm.

⁶⁴Vé‑eè gwàtì atàá cù vév e nyùy, vikìy véví búŋ kilíŋ ké a dìy áwune.

⁶⁵Á bèy, NYÙY TÀR nèn tùmnín mo wìr tùmnín fo mbuùné, moo wánlè lùmèn wo wù savnìn e si melùʼ.

⁶⁶Wù túmnín, e kù nèn tàʼár aŋgaà vév vibàn, e wày woómé aáwuné kitu, e dù, e jòʼsì.

⁶⁷Wù‑uù lò fó fo, e tèn kfə́ə Joosev, e làa yòʼ dzə́ə shoʼ rám Efrayim.

⁶⁸Wù shóʼ a dzə̀ rám Juda, à Gwan Sion wo wù koŋè.

⁶⁹Wù‑uù bòm lav ye á cu wun sho fo, yì kóʼ é yuv moo kirùmèn, a tiy kitávín moo nsay ye wù‑uù bomen, yì wáa dzə ŋkuuŋkùŋ.

⁷⁰Wù‑uù shòʼ ŋgaà və lìm woo Davir, e tàʼ, e lì fo kwaʼ njiì

⁷¹fo wù‑uù shiy anjiì, e nèn lèm ji wù wáa leéy a dzə̀ fo rám Jakovi, a shìy wír və́ veé Isray.

⁷²Davir ku nèn a leéy fo áwune shilív shimòʼón, a dànèr áwune e mbòómbòŋ ji nyaáŋ.