Read Lamnso Nsùyrì Nyùy 79 Bible Online

Nsùyrì Nyùy 79 - Lamnso bible

Nsùyrì Nyùy 79

¹[95] Éè Nyùy, vitúm vi nə̀ə́ ne e wò nsay. Á bìvír ne lav yè cù ye ranén, e tòn Jerusalem, wù dú é kibvə.

²Á fò ne dzə́n sé aŋgàa lìm vé, á fò ne ji aŋgùrúʼú wáa sàtì. Á fò ne dzə́n sé wìr vé, á fò ne ji nyám se kwaʼ si wáa kfər.

³Á seèrí wír vé, mensə́ mè wáa leŋ moo ndzə́v, léŋ bèn Jerusalem e dzə̀m. Wìr yòʼ kfə̀n dzə̀ shó wóo dzəə̀mè áwune.

⁴Vitúm vee věr ghaŋ vi shéʼ ver. Wír ve á kaarin ver, e tàrí jaʼ ver, shéʼé.

⁵Éè NYÙY TÀR, à wíy shwiíy kilòŋ, e dù, e meé e le? À kù wíy a shwiíy kilòŋ, e dù, e jòʼsì à? À kù wíy a leéy ver e sí ye baarí a?

⁶Ku dìn dòʼshwiiy wò e vitúm ve ví méŋ wò vi. Dìn dòʼshwiiy wò e wír ve á tén fó a sùyrì wòo.

⁷Áwune yùyrí ne Isray wo dzəə̀n wír vé, e kèr woŋ wóv, e laàr fó láarin.

⁸Kii wò, lá à yòʼ màʼ ŋgeʼ e věr kitu. Lá à yòʼ màʼ, bìʼ vinyo ve bi vé atàr vér. Ku shàm mendzən mer mè. Ku shàm lèn lèn, vèr sí yaʼ yàʼàn.

⁹Éè Nyùy woo ŋgaà lùŋèr wor, sə́ ver. Ku sə̀ ver, aá wáa burí vikuʼùy vé. Bòyìr ver, e màn ajay vérí, aá wáa ghvəm yír yé.

¹⁰Kí yoʼ ghèén ji vitúm vi wáa jàʼ ver, a dzər e vèr jii, «Nyùy won bèé?» Ku yiì, é vèr yén mo à siir ŋkfə́tír e vitúm vìy vi, ŋkfə́tír woo jii, vé‑eè seèrí á wír vé.

¹¹Yú tóŋ wìr ve á lim sháŋé. Ku sə̀ wír ve á foon ji á yúyrií fó kpu. Ku lùŋèr áwune e vitaáví vé ve ghaʼtín ví.

¹²Éè NYÙY TÀR, ku siìr ŋkfə́tír e vitúm vìn vi kàŋ là táŋ, ŋkfə́tír woo bìʼ liy se áwune kuùn ne wò sho.

¹³À siirì, é vèr wáa beèrì wò ghán sidzə̀m, ver vee wír vé, ve á dzəə̀n moo njiì wo à danèrì, é ŋgwàʼ sidzə̀m si wìy a burí wò, e dù, e jòʼsì.