Read Lamnso Nsùyrì Nyùy 80 Bible Online

Nsùyrì Nyùy 80 - Lamnso bible

Nsùyrì Nyùy 80

¹[96] Éè nshìy wìr veé Isray, ku yù tóŋ yérí, wò, wo à danèr rám Joosev mo á dànèr njiì. Wò, wo à dzə́ e kàvàʼ e *vifá veé yuv ve ví kér vav si ví nsàn, ku dìn kitú ké ki e rám Efrayime wùn à yé Benjamine, à yé Manassèe. Dùŋrì vitaáví vé vi, e wìy, e lùŋèr ver.

³Éè Nyùy, kfən tìír ver e věr shwin. Dìn shilív shé she juŋ shi e vèr, é vèr yii lùŋ.

⁴Éè NYÙY TÀR, Nyùy woo Taà Mànjòŋ, à wíy shwiíy kilòŋ, e dù, e meé e le? À wíy jevrí bìʼ bunrì wìr vé, e dù, e meé e le?

⁵À yìír ne ver e mendzən mè. À fò ne ver mensíy nyanyày ji á nó.

⁶À yiì ne, nsay yer kfə́n ji kifá ke vitúm vee fó ghaŋ vi wáa taŋnín sho, aŋgàa vibàn vérí kaárí, a sheʼ ver.

⁷Éè Nyùy, wò woo Taà Mànjòŋ, ku kfə̀n tìír ver e věr shwin. Dìn shilív shé she juŋ shi e vèr, é vèr yiì lùŋ.

⁸Wò‑oò shòʼ kitiír ké vayin fo Ejiv, e wìy jùm vitúm fo nsay Kanan, e bìy fo.

⁹Wò‑oò kaàsì fó, e tùŋ, gháŋ rəə́ nəə́ é nsay, kí téʼ, e sə̀ fó e dzə̀m,

¹⁰kindzə̀ə́ndzəm kfə́ kí sə́tí agwan, e sə̀tí lúm se vici vé *sidar e tám sə́ sí.

¹¹Tám sə́ sí rám, e mèé e Rìbà Ndzə̀v, wóné tókír, e tàʼám, e mèé e ndzəv yee Yufret.

¹²À bàʼ lèn kay ye yí gìŋèn wun, e tàr bìʼ ka? Anshaàdzəə̀ adzə̀me sí koy tútúʼ və, kfə́rí.

¹³Kitsəətsə̀ŋ ki tùŋ ne, e bàʼ, nyám se kwaʼ sidzə̀m si wáa kfər.

¹⁴Éè Nyùy, wò woo Taà Mànjòŋ, bìnkìri, e wìy sə̀ ver. Màʼ sí yée fó yuv, e yèn ver. Ku shàm mendzən me kitìír ké kìn,

¹⁵kitiír ke wò‑oò bìyìn e wó yée.

¹⁶Á tòn ne kitiír ké e və́yí, e gwàr, e wày é nsay. Ku kàv vishí vé vi, e laàr áwune, aá sə́ʼsí.

¹⁷Kìŋsìn fon wo à shoʼon, ŋgaà wo à tavirin ji wir wò.

¹⁸Vèr yòʼ kfə̀n dzəə́ wìy bìn ndzə̀m e wò. Ku lèm ver shó, é vèr wìy a cù wò, a yòŋ yír yé.

¹⁹Éè Nyùy, wò woo Taà Mànjòŋ, ku kfə̀n tìír ver e věr shwin. Dìn shilív shé she juŋ shi e vèr, é vèr yiì lùŋ.