Read Lamnso Nsùyrì Nyùy 81 Bible Online

Nsùyrì Nyùy 81 - Lamnso bible

Nsùyrì Nyùy 81

¹[97] Á wáa fuŋ yòv e Nyùy woo kikiŋ késən, a yòv, a burí Nyùy Jakov.

²Á wáa màʼ luŋ, a kùm nshùm, a bàytì lúŋ, à yé nshìí shó.

³Vèn tóŋ sóŋé, aá keʼ ŋkàʼ. Vèn tóŋ é kishiíy ké mbìy ki fó ŋwee, e tòŋ é ghan se wú yoʼon kirə́m.

⁴Dzə̀ sáʼ ye Nyùy foon e wír veé Israyi, a dzə̀ kinyo ke wun woo Nyùy Jakov tinen ne.

⁵Wù‑uù lèm ji nsər yev, e ghan se wù‑uù maʼ ŋgeʼ e wír veé Ejiví kitu. M yú kimeŋnìn ke jì, a yì suuy jii,

⁶«M sə̀ʼə́r ne vimbùŋ fo věn mbèʼ, vèn bóy fó akwiiròn ve vèn‑eè túŋé.

⁷Vèn‑eè dzə̀ é mvə̀m ŋgeʼ, e tòŋ, m bóyír ven. Mò‑oò wìy, e sə̀ ven, a m dzə̀ é mvə̀m mbàʼ fo mò‑oò lirì, a mò‑oò lo mùm ven é ndzəv seé Meriba.

⁸«Éè wìr vem, vèn ku yuùrí kinyo ke m kantì ven shó ki. Éè wìr veé Isray, bo vèn‑éè yuurí kinyo kém kee jii,

⁹lá vèn yòʼ a lèm anyùy kisaŋe e věn mvəm, lá vèn yòʼ a ghvəm anyùy vee shooy.

¹⁰Dzə̀ mo NYÙY TÀR woo Nyùy won, mo, wo mò‑oò fəərin ven fó wòŋ woo Ejiv. Vèn maʼ wó yéné, é m ku rùnsí e vifá ve juŋ vi.[98]

¹¹«Yii bèy, áwune vee wír vémé‑eè tèn fóo yunín mo, la vèr áwune yòʼ kfə̀n a ker kinyo ké a taŋ.

¹²M nèn shwèy áwune, á wáa bùy, a dù, a yiì kinyo ke melív mev mè tíy sho.

¹³A wír veé Israyi‑iì yú kinyo kém, aáwune‑eè ghán e mǒ mbòv,

¹⁴bo mò‑oò fùnèn aŋgaà vév vibàn, e fùnèn, e tòn áwune cér,

¹⁵é wír ve á ban mo adzə̀me tsə́m ndzəə́ e mǒ si, é m maʼ ŋgeʼ yee là may aáwuné kitu.

¹⁶Yii bèy, é m wáa yiír ven e sáŋ ye juŋe, a yiír e dòŋ, é vèn wáa la, a kur.»