Read Lamnso Nsùyrì Nyùy 83 Bible Online

Nsùyrì Nyùy 83 - Lamnso bible

Nsùyrì Nyùy 83

¹[101] Éè Nyùy, lá à yòʼ gòʼ kisə́sə. Éè Nyùy, lá à yòʼ a tiy e ŋkfə́né.

²Aŋgaà vé vibàné sí wiy e melaà mè. Aŋgaà vé menàŋé sí lór wò e vinyo vi.

³Áwune sí bá menàŋ e wír vée bàm, báʼti, wóŋ wír vé ntayi.

⁴Á jaŋ wíri jii, «Vèn wiy, é vèsən laar wír veé Isray, aá sə́ʼsí yír yév fó kitu ke nsay ŋkuuŋkùŋ.»

⁵Rúrú, áwune tàr ne shuu, e yì *mensaŋ ji á kaáy wò.

⁶Aá dzə̀ jii, wír veé Edom wùn à veé ram Ishmaeli, veé Moav wùn à veé Hagrìi[102]

⁷à veé Gebal wùn à veé Ammon, à veé Amaleki, e lì veé Filistia wùn à veé Tayàa.

⁸Jòkìnyàʼ, wír veé Assiriyàa suùsín ne, e tòm rám Lot ye dzəə̀n wír veé Moav wùn à veé Ammone.

⁹Lóvtí aáwune mo wò‑oò lovtin e wír veé Midiane. Lóvtí aáwune mo wò‑oò lovtin e Sisera wùn Jabin e ŋguùŋè ndzə̀v yeé Kishon.

¹⁰Wò‑oò laàr wír vìn e En‑Dor, e laàr, dzə́n sév sí fòy fo.

¹¹Lóvtí e vilìmbìy vév ví mo wò‑oò lovtin e Orev wùn Seev. Lóvtí e vitú vév vé saʼ vi mo wò‑oò lovtin e Seba wùn Tsalmunna.

¹²Vé‑eè sévti jii, «Vèr kér fóo tòn wír veé Isray, e faàsì nsay ye Nyùy lèmèn áwune shó.»

¹³Éè Nyùy wom, táʼár áwune mo kìrkir tàʼár kibvər, e fèér áwune moo mvə́y se shwéri feerì.

¹⁴Jùm áwune e kinsəm ké ki, e bèmér áwune e kìrkir, aá wáa fàn mo dzə̀ və́y wo wú ton kóv, a fàn mo dzə̀ kiliímé ke və̀y ke kí shwí aàgwan.

¹⁶Éè NYÙY TÀR, ku sèn áwune, aá wáa woomé, a binsí ji yír yeé dzə̀ e gháʼtín.

¹⁷Ku màʼ áwune, aá wáa woomé ghán sidzə̀m, e kpu kpú nshoórsíi, e lày.

¹⁸Yìi, aáwune kiíy ji kù jòʼsì wò NYÙY TÀR, a kiíy ji kù dzə̀ wò Taà Vitu wo wù sáʼ kitú ke nsay.