Read Lamnso Nsùyrì Nyùy 86 Bible Online

Nsùyrì Nyùy 86 - Lamnso bible

Nsùyrì Nyùy 86

¹[106] Éè NYÙY TÀR, yuúrí tóŋ yémé, e sə̀ mo, bìʼ fo á nəʼsì mo, a m dzə̀ là kitar.

²Lèm dzəʼə̀m yémé shó, bìʼ fo m kù tíy e wò wùn. Lùŋèr ŋgaà lìm wò wo wù tiir vifií e wò wùn.

³Éè NYÙY TÀR, à dzə̀ Nyùy wom, ku shàm mendzən mem mè, bìʼ fo m kù yii tóŋ a dzə̀ e wò ghán sidzə̀m.

⁴Éè NYÙY TÀR, yìi, é m wáa sheʼrí, bìʼ fo m kù bunrì, leey a dzə̀ wò.

⁵Rúrú, NYÙY TÀR, à dzə̀ e juŋ. À yòʼ yar fó a làysìn ajay wíri. À yòʼ yar fó a dìn koŋ yé e wír ve á bunrì wòo.

⁶Éè NYÙY TÀR, yuúrí bunrì yémé, e yù tóŋ ye m tíy ji à sə́ moó.

⁷M lóo dzə e mvə̀m ŋgeʼ, m kù a toŋ e wò, bìʼ fo à kù yii yuúri tóŋ yém, sə́ mo.

⁸Rúrú, NYÙY TÀR, a fə̀m dzə̀ anyùy feyì ve wíri cu, bo bó wùmòʼ yòʼ dzə̀ moo wò, a bó lim símóʼ sí yòʼ kfə̀n dzə̀ shó moo sé.

⁹Kù‑uù bòm wò vitúm vidzə̀m, a ví kù yíi a wìy, a sùyrì wò woo NYÙY TÀR, a wùʼsì yír yé.

¹⁰À dzə̀ e wíy, kfə̀n yii viŋgaʼnìn ve vinyò. Kù jòʼsì wò wo à dzəə̀n Nyùy.

¹¹Éè NYÙY TÀR, yéʼéy mo kinyo ke à taʼ ji m wáa yiì, é m wáa ghan e wò mbòv, a yiì vinyo ve ru ví. Yìi, é shilív shém shí wáa tiy e wò wùn ghán sidzə̀m.

¹²NYÙY TÀR, m beerì wò shilív shém shidzə̀m. Nyùy wom, m kù wíy a burí wò, e dù, e jòʼsì.

¹³À koŋ mo féyì, koŋ là meemè. Aà sə̀ ne mo fo kpúu, m bóy fo aŋkfəə́ wòŋ.

¹⁴Éè NYÙY TÀR, antavkìtuu sí kóʼnin e mǒ kitu, a vintav ve wíri ví guutì mo, aá dzə̀, a bó á yòʼ mvəʼ sí, yén wò gheéy.

¹⁵Yii bèy NYÙY TÀR, à dzə̀ ké, aà yii shám wíri shámén, kér mendzən, lo ji weè e dòʼshwiíy, din koŋ yé ye ghaʼáné e wír vée, tíy e wò ŋkàʼmé.

¹⁶Éè NYÙY TÀR, ku lèéy mo, e shàm mendzən mem mè. Távír mo woo ŋgaà lìm wò, bìʼ fo m lim fo wò, kù mo yè wor‑iì limè.

¹⁷NYÙY TÀR, ku dùŋrì kisəəm ké kòŋ ye à kér fo mò kí. Dìne, é wír ve á ban moó jaáy, a woomé, bìʼ fo á yíi yen mo à səən ne mo, e kfə̀n rəə̀r shilív shém.