Read Lamnso Nsùyrì Nyùy 88 Bible Online

Nsùyrì Nyùy 88 - Lamnso bible

Nsùyrì Nyùy 88

¹[109] Éè NYÙY TÀR, wò woo Ŋgaà Lùŋèr wom, m tóŋ e wò e shùy, tóŋ vitsə́ʼə́, mbaa wò.

²Ku yù bunrì yémé. Fó vituʼùr ví, e yù tóŋ yémé.

³M sì ŋgeʼ si ŋgeʼ si, a m sì é mentsə̀m me wòŋ aŋkfə.

⁴Á wày ne mo é ŋgoo wìr ve á sí du e sày, mo, a m sì ji wír, a wù sénén ne, kitar ki máy.

⁵Á màʼày ne mo aàŋkfəə́ mvəm, moo wír ve á seerin, á wáa neŋ e sày. M sì kifá ke bó à yòʼ dzəə́ leeyì. Kifá, a bó à yòʼ dzəə́ kér shií fó fo.

⁶À màʼ ne mo, e lèm e sày, m wáa neŋ e loònsay, e ŋòròʼ.

⁷Dòʼshwiíy kív wò bìʼ mo, a m fan, yaʼà. Dòʼshwiiy wò sùm ne mo, mo rùn ndzə́v, a tsəynín.

⁸À yiì ne, aŋgàa ŋgoo vémé wáa leʼ mo léʼén, m wáa dzə moo *kifàn fo áwune.

⁹Ŋgeʼ si yiì ne, síi wáa səəné mo səə́nén. Éè NYÙY TÀR, m kù yoŋ wò kishiíy kidzə̀m, nan wó yém e wò si, lón ji à shám mo.

¹⁰À yii lim viŋgaʼnìn ve vinyò aàŋkfəə a? A dzə̀ áwune fəə̀, a burí wò à?

¹¹A wíri sì é sày, a dzə̀ á kfə̀n a fìʼtì koŋ yé ye à yii kér fo wíri á? A dzə̀ á wàa fìʼtì aàŋkfəə́ wòŋ mo à yii tíy e wò jì a?

¹²Aŋkfəsàyi yii yén viŋgaʼnìn vé ve lìm, aá néŋ a dzə̀ é ŋòròʼ à? Áwune dzəə́ yén mo à sə́ wíri, luŋèrì, aá sì é kirə̀ʼ fo à yii laysìn wíri láysin á?

¹³Éè NYÙY TÀR, m kù tóŋ a dzə̀ e wò. Lóo dzə kijàvndzə, m kù a bùnrì wò.

¹⁴Éè NYÙY TÀR, à màʼày mo ben bìʼ ka? À bìn ndzə̀m e mò ben bìʼ ka?

¹⁵Kèʼ feyì, a m dzə̀ə́ e térí, m kù‑uù yèn ŋgeʼ, e bǒy kpu. M sorkìr bìʼ ŋgeʼ se à màʼàn e mò, mo là kitàr.

¹⁶Dòʼshwiíy wo wù kív wò, sùm ne mo súmen. Virom vé vi shaà ne vitaáví vém.

¹⁷Kishiíy kidzə̀m, kù dzə̀ mo ndzə́ví sum mo, aá kù nyoorì mo nyóorin mbìv sidzə̀m.

¹⁸À yiì ne, ŋkar sém sí léʼ mo, e lèʼ, à ŋkar yem tìm shó. Kù jòʼsì ne vèr à ndzə vitsə̀ʼ.