Read Lamnso Nsùyrì Nyùy 89 Bible Online

Nsùyrì Nyùy 89 - Lamnso bible

Nsùyrì Nyùy 89

¹[110] NYÙY TÀR, m wíy a yòv ghán sidzə̀m, a taŋ vinyo vé e ŋgwàʼ si sidzə̀m. M wíy a taŋ mo à koŋ wír vé, e dù, e mày, a fuŋ, a fìʼtì mo à tíy vèn áwune, e dù, e jòʼsì.

²À kù wíy a kòŋ wír vé ghán sidzə̀m, là yar. À kù wíy a tiy vèn áwune ji ŋkǐŋ moo yúv wo wú tíy kfə́ fó.

³Wò‑oò sùúy jii, «M gwàr ne *mensaŋ vèr à wìr wom ntay. M yiì ne kilìʼ vèr Davir woo ŋgaà lìm wom jii,

⁴‹M wíy tuúy rám yé, é yí wáa tiy fo ghán sidzə̀m, e bàʼrì vifon vé, é ví wáa dzə fo ŋgwàʼ sidzə̀m.› »

⁵Rúrú, NYÙY TÀR, kifá kidzə̀m keé yuv kí búri wò, fiʼtì viŋgaʼnìn vé ve lìm. Kintatì ke nsheèlav sé ki kwá wò, táŋ mo à kù yii tíy vèn à wír vée.

⁶NYÙY TÀR, dzə̀ la é mbàʼ wo dzə̀ á fìʼsìn vèn wun? Dzə̀ nshìylav rəné[111] ye dzə̀ á fìʼsìn wùn NYÙY TÀR?

⁷Kintatì ke nsheèlav sé ki ghvə́m wò. Á ghvə́m kfə̀n fan wò e ŋàáŋàŋ, e shaà kifá kidzə̀m.

⁸NYÙY TÀR, wò woo Taà Mànjòŋ, a dzə̀ fìʼsìn la vitaáví və́ e vé vi? Kinyo ke à yii ki kù yii tíy fo, a bó yòʼ dzə̀ wìr kòr.

⁹Sáʼ wò rìbà ndzə̀v wo wù runen, a tsəynín. Wù lóo tsəynín, mendzə́v mè lóo koʼ e yuv, à kù rəə̀r.

¹⁰Wò‑oò bvə̀ʼə́y kigàgǎʼsòŋ kee Rahav,[112] e yùyrí. Wò‑oò tàʼár aŋgaà vé vibàn e kóy wó wo tavíné.

¹¹Kér wò yúv, a kù kér wò nsay. Bòm wò kitú ke nsay, à kifá kidzə̀m ke kí dzəə̀n shó ki.

¹²Kuy wùn à tsə́né kù‑uù bòm wò. Gwàn Tabor wùn Hermon kù séŋ moo wír, ndzə́ʼ a dzə̀ wò.

¹³À kér kóy wo tavíné, a wó yée kér vitaáví é ŋàŋ. Kóy wó yìyí dzə̀ é yuv, maʼ rə́r sé.

¹⁴À bàʼrì sáʼ yé a dzə̀ e yii ye juŋe, là kiloʼ. À kù tìír a dzə̀ koŋ yé wùn à suuyrú wò fo mbìy.

¹⁵NYÙY TÀR, bòŋ ké wìr ve á shéʼri wò, ndzə́ʼ wò ji Fon. Áwune ghán, warkìr e mvə̀m ran ye à fó aáwune.

¹⁶Áwune túy shwín bìʼ wò vishiíy vidzə̀m, wuʼsì yír yé, bìʼ yii yé yee là kiloʼ.

¹⁷Dzə̀ wò kóy wór wo tavíné, wo vèr shéʼri. Kù yíi yiì tóm ye à tóm ver, é bo vèr ton aŋgaà vér vibàn.

¹⁸Rúrú, kér NYÙY TÀR ŋkeè wor rə̀r. Fòn wor kù dzə̀ a dzə̀ e wun kiwo, wun woo Ŋgaà wo Ranén woó Isray.

¹⁹Yì‑iì dzə̀ é ghan símóʼ sí fó ŋgùʼ, wò‑oò ghèm ndzə aàŋgàa ntum vée, e sùúy jii, «M nàn ne kóy ntav wùmòʼ. M kòʼór ne ŋgaà wo m shoʼon fo wírí mvəm.

²⁰M tàr ne, e yèn Davir woo ŋgaà lìm wom, e yòʼ wun e meŋgvə́r mem mè ji fon wo shoʼon mo.

²¹M wíy a tom wun ghán sidzə̀m, a dzə kóy və́ wo tavíné.

²²Aŋgaà və́ vibàné yòʼ wíy neèr ndzə̀m rə é nsay, vé liì kisaŋe yòʼ wíy shoór wun.

²³M wíy laàr aŋgaà və́ vibàn e wun si, e yuyrí wír ve á ron wúu rə́ adzə̀m.

²⁴M kù wíy a tiy vèr Davir, a kòŋ wun ghán sidzə̀m. M wíy sə wun, é wù ton aŋgaà və́ vibàn adzə̀m.

²⁵M wíy way rìbà ndzə̀v e wun sar saʼ, e kfə̀n fo ndzə́v sí shó, é wù wáa saʼ.

²⁶Wù wíy a neŋ e mǒ si, a kwa mo jii, ‹À dzə̀ Tàr wor, à dzə̀ Nyùy wom, dzə̀ wò Kilán ke kí kìŋsìn mo, m lúŋ.›

²⁷M wíy lì wun ji wán wom mbìy, e lèm ji kitú ke afòn veé kitu ke nsay.

²⁸M kù wíy a kòŋ wun, e dù, e jòʼsì, a mensaŋ me vèr wun mè yòʼ wíy mày.

²⁹M wíy tuúy rám rə́, é yí goʼ, a dzə ghán sidzə̀m, e fo sáʼ sho, e meé mo yúví wíy dzə̀ʼə̀m, e dù, e jòʼsì.

³⁰«Yii bèy, a wón vəə́ màʼày nsər yem, e tèn fó a jùmrì kinyo ke m tinen,

³¹aáwune ŋwày sáʼ yém, e tèn fóo lèm nsər yem,

³²bo m wíy màʼ ŋgeʼ aáwune, bìʼ shóʼór ye á shoʼorin nsər yem, maʼà, é m shóʼ virə́ʼ vév e ŋgwàne, bìʼ vinyo vév ve bi ví.

³³Yii bèy, a bó m yòʼ wíy yàr fó a kòŋ Davir, a bó m yòʼ wíy kuvsín ŋkàʼmé wo mò‑oò kàʼàn wun sho.

³⁴M yòʼ wíy yaʼáy mensaŋ me mò‑oò gwàrìn vèr wun, a bó m yòʼ wíy kuvsín ŋkàʼmé wom.

³⁵«M yì ne kilìʼ, e kàn kitú kém moo Nyùy, é kinyo kìn ki kú a tiy fo, e dù, e mày, a kí dzə̀ ji m yòʼ wíy boʼtí Davir.

³⁶Rám rəə́ wíy shaàrì. M wíy a shìy vifon və́, a shìy, e meé mo shùy wíy a ban.

³⁷Ví kù wíy a tiy fo vituúyín ŋkuuŋkùŋ moo ŋwee, ŋwee wo wú tíy e yuv moo njen woo jwáʼ.»

³⁸Lèn, à tèn ne ŋgaà wo wò‑oò yoʼon. À mèŋ ne wun, e kù a shwiíy a dzə̀ kilòŋ vèn wun.

³⁹À fə̀tí ne wó yé fo mensàŋ, mensaŋ me wò‑oò gwàrìn vèn wìr wò lìm. À dzə̀vrì ne ntáráʼ və é kibvə̀r.

⁴⁰À tòʼ ne virə́v vé kày vee wun ŋkàlaʼ vidzə̀m, e kètì virə́ʼ ve tavkín ve ví kiŋ kitúm kfə́.

⁴¹Wìr dzə̀m wo wù shaa fo kù sí shóŋ wun shóŋén, aàŋgàa shweesí vəə́ sí ŋwáy wun ŋwáyín.

⁴²À nàn ne kóy aŋgaà və́ vibàn, e yiì, áwune wáa sheʼrí.

⁴³À bvə̀nrí ne nyùy rə rə̀r, e tèn fóo tom wun e shùu rər.

⁴⁴À sùn ne kitoómé fó kiwo wo, e bàʼ wun fo kàvàʼ.

⁴⁵À shèr ne vinsùm və́ é dzəə, e sùm wun e woómé si.

⁴⁶Éè NYÙY TÀR, à wíy lìr fo věr si, e dù, e jòʼsì à? Dòʼshwiíy wíy kiv wò, e dù, e meé e le?

⁴⁷Éè NYÙY TÀR, kuúmé mo dzəʼə̀m wìr msòŋé tsəmerin. Kuúmé ji wò‑oò bòm wír ji wù wíy kpu.

⁴⁸Dzə̀ la wo dzə̀ wù shìíy, e làa yòʼ wìy kpu? Dzə̀ la wo a ghán sí ghèén, wù tèn fóo dù e mbòʼlaʼ?

⁴⁹NYÙY TÀR, koŋ ye wò‑oò koŋ wír vé fo mbìyi bèé? Koŋ ye wò‑oò kàʼàn, e yiì kilìʼ shó vèn Davir.

⁵⁰Éè NYÙY TÀR, ku kuùmé mo á shur aŋgàa lìm vé e liy si. Kuúmé mo m kúr shilív fó liy se wíri shur mo shó.

⁵¹Éè NYÙY TÀR, aŋgaà vé vibàné shur mo e liy si. Aŋgaà vé vibàné shéʼ ŋgaà wo wò‑oò yoʼon ji fon.

⁵²Búríi wáa dzə fo NYÙY TÀR ghán sidzə̀m. Amen, Amen.