Read Lamnso Nsùyrì Nyùy 9 Bible Online

Nsùyrì Nyùy 9 - Lamnso bible

Nsùyrì Nyùy 9

¹[11] M yíi a beèrì NYÙY TÀR shilív shém shidzə̀m, a fìʼtì viŋgaʼnìn ve lìm se wù yii.

²Éè Taà Vitu, m yíi a sheʼrí, a seŋ, a sàvnìn, a yòv, a burí yír yé, bìʼ vinyo ve ghaʼtín ve à yii.

³Aŋgaà vém vibàné yíi yen wò, aá binkir, a leʼ, a gbùkìr, a kivkír, a kpukír e wò si.

⁴À tìnén ne vinyo vém é nsànloŋ, aà dzə̀ʼə̀m ne e wò kàvàʼ, a tinén là kiloʼ.

⁵À tìnén ne nsaʼ vitum, yì koó áwune. À laàr ne wír ve á méŋ wò, e sə̀ʼsí yír yév ŋkuuŋkùŋ.

⁶Aŋgaà vé vibàné lày ne ŋkuuŋkùŋ, aà laàr ne ŋkà se laʼ sév, a bó wìr yòʼ dzəə́ yoŋ yír yév.

⁷NYÙY TÀR kù sáʼ vifon ghán sidzə̀m. Wù màʼ ne kàvàʼ, a tinén nsaʼ,

⁸a saʼ kitú ke nsay là kiloʼ, a tinén nsaʼ se wíri é nsànloŋ.

⁹NYÙY TÀR dzə̀ kóy atànfóneèrshwín wo tavíné, kóy wóv wo tavíné, é ghan sé ŋgeʼ.

¹⁰Éè NYÙY TÀR, wír ve kiìn wòo tiir vifií a dzə̀ e wò wùn, bìʼ fo à yoʼ bìn ndzə̀m e wír ve á taʼ wòo.

¹¹Á wáa yòv, a burí NYÙY TÀR wo wù dzə́ e Sion, a sàmèr vinyo ve ghaʼtín ve wù yii e vitúm vi.

¹²Wun wo wù yii siir ŋkfə́tír yíi siìr e wír ve á nyavrì e wír vəə́, a bó wù yòʼ ŋwáy tóŋ wìr ve á nəʼsì áwune.

¹³Éè NYÙY TÀR, ku yèn mo aŋgaà vém vibàné ron wúu yém. Shám mo, e sə̀ mo fo kpúu,

¹⁴é m fíʼ a sàmèr búrí yé e wír veé Jerusaleme, a sheʼrí wò bìʼ luŋèr ye à lùŋèrìn mo.

¹⁵Vitúm vi‑iì túŋ bií ji m gbu shó, kfən gbù áwune shó. Vé‑eè tám lálán, kù ndzə̀v áwune shó.

¹⁶NYÙY TÀR yiì ne, á kiíy mo wù dzəə̀n. Wù tìnén nsaʼ, e yiì, wír ve á méŋ wune ku lì e kitam ke koʼorin áwune.

¹⁷Ké wír ve á méŋ Nyùy ki kù jòʼsì ne ji kpú, kù bey, à ké vitum ve ví laysìn Nyùy vidzə̀m vi.

¹⁸Yii bèy, á yòʼ wíy a làysìn vé kitàne, a bó yòʼ dzə̀ kwaʼtì aghéʼnceyí wìy kòsìn, e lày kisáŋ ŋkuuŋkùŋ.

¹⁹Éè NYÙY TÀR, ku shwìr, lá à yòʼ màʼtì, é wìr yov nsiì ji wun ghàʼ ne wò. Ku tìír vitúm vidzə̀m e wò kibàʼ ke nsaʼ, e sàyrì vinyo vév ví.

²⁰Ku bèmér áwuné NYÙY TÀR. Ku yiì, aáwune kiíy ji á dzə̀ á wíri, aá kù wíy kpu.