Read Lamnso Nsùyrì Nyùy 90 Bible Online

Nsùyrì Nyùy 90 - Lamnso bible

Nsùyrì Nyùy 90

¹[113] NYÙY TÀR, à kù‑uù sì ji láʼ fo vèr. À kù‑uù sì ji láʼ yér mo ŋgwàʼ sér sí‑iì dzəə̀n.

²À kù‑uù sì Nyùy, é bo agwane wáa dzə. À kù‑uù sì Nyùy, e bóo wìy a bom kitú ke nsay wùn à wóŋe. Aà kù wíy a dzə Nyùy, e dù, e jòʼsì.

³Kér kí dzə̀, a kù yii siir wò wír, siirì, ji wù kfə́n é kifa ke wù‑uù dzəə̀n fó mbìy. À lo, à bìnèr wún wór, wú kfə̀n é nsay.

⁴Fo ké ki, viyá nsə̀kì vi dzə̀ moo kishiíy ke kí shaàn ne, moo shintsə̀mén shé ghan she shí gheenen, e nèn kù shaà.

⁵À lo, à sàsìn, e laàr dzəʼə̀m wìr, kù mo shì njèm wír, wír, aá dzə̀ moo viŋgà ve ví tó kijàvndzə.

⁶Viŋgà vi teʼ, buy kijàvndzə, ŋkuùr gheenè, ví yùm, e sòóy.

⁷Éè Nyùy, kilòŋ ké ke shwiiyín kí lo, kí laàr ver láarin. Dòʼshwiíy wo wù kív wò lo, wù sùm ver súmen.

⁸À neèr ne vinyo vér ve bi ví e wò si, aà yén sa ve vèr yii e kilìr.

⁹Dòʼshwiiy wò yii, a dzəʼə̀m yérí tsə́merì, a viyá vér ví may cér moo shwém.

¹⁰Dzəʼə̀m wìri kù sí mee a dzə̀ kiyá msaàmbà, kìn mwaamé fo wo wù tavin, yii bèy, a kù dzə̀ sorkìr wùn à ŋgeʼ si. Dzəʼə̀me nèn kù mày, vèr nèn shaà shaàn.

¹¹Kìíy ne la mo vitaáví vé kilòŋ ke kí shwiiy wò vi dzəə̀n? Kìíy ne la mo dzə̀ dòʼshwiiy wò yiì, wìr wàa fàn, a yàʼ?

¹²Yéʼéy ver, é vèr kiíy ji dzəʼə̀m yérí dzə̀ e tsə́m. Yéʼéy ver, é vèr bóo fíʼ a ker vifií ve ru ví.

¹³Éè NYÙY TÀR, à wíy shwiíy kilòŋ, e dù, e meé e le? Neèr dòʼshwiiy wò, e shàm mendzən me aŋgàa lìm vé mè.

¹⁴Dìn koŋ yée e vèr vijàvndzə vidzə̀m, é yí gheén ver. Dìne, é vèr bóo fíʼ a sheʼrí, a yu vijuŋ ghán sidzə̀m.

¹⁵Mo wò‑oò màʼàn ŋgeʼ e vèr ntàmda, yiì lèn, é vèr yú sá vijuŋ ntàmda.

¹⁶Ku yiì, áàŋgaà vé lìme yén viŋgaʼnìn vé ve lìm, é wón vérí yén sá vitaáví ve ví din vikuʼùy vé.

¹⁷NYÙY TÀR woo Nyùy wor, ku lèéy ver, a kòŋ. Ku yiì, é vinyo vér ví wáa ghan. Rúrú, ku yiì, é ví wáa ghan kijuŋ.