Read Lamnso Nsùyrì Nyùy 91 Bible Online

Nsùyrì Nyùy 91 - Lamnso bible

Nsùyrì Nyùy 91

¹Wìr wo wù bee kfə́ e Nyùy woo Taà Vitu sar kikfəvsì, a Nyùy woo Ŋgaà Vitaàví Vidzə̀m kúʼti wun,

²ŋgaàŋ yíi a yòŋ e NYÙY TÀR jii, «Kù kiŋsìn wò mo, a kù shiy wò mo. À dzə̀ Nyùy wom, a m tiir vifií a dzə̀ e wò wùn.»

³Rúrú, Nyùy yíi fəə́r wò fo vitam ve á koʼorin é kilìr, e fəə́r fo yàsi kifə̀ʼ.

⁴Wù yíi kuʼtí wò e wun sar vàv, a shìy, áà wáa dzə là kinyo ké a fàn. Nyùy tíy wùn à wír vəə́, a wù wíy a kìŋsìn wò moo ŋkeè.

⁵À yòʼ yíi a fàn vifá ve ví ghíʼ wíri vitsə́ʼ, a bó à yòʼ yíi a fàn mvən se sí shaasìn e shùy,

⁶kìn yàsi kifə̀ʼ wo wù bám wíri vitsə́ʼ, kìn kileémé ke kí laar wír e shùy.

⁷A dzə̀ wíri gbù, e kpùkír e wò ghaŋ nsə̀kì, a dzə̀, á kù gbù, e kpùkír nsə̀kì e ghvə̀m, a bó kitú ki yòʼ yíi bùm wò gheéy.

⁸Ku yiì shòvtí ké a dzə̀ síi, a leéy mo á maʼ ŋgeʼ e wír ve á méŋ wòo.

⁹Mo à tiirin ne NYÙY TÀR ji kikiŋ ké, e lì wun woo Taà Vitu ji kirə́ʼ ké ke kilìr,

¹⁰bo bó kinyo ke bi kí yòʼ wíy nəə́ wò, a bó melaà mè yòʼ wíy meʼ fo à dzəə̀n.

¹¹Nyùy wíy suúy, é nsheèlav sə́ sí wáa shìy wò, a kìŋsìn e virə̀ʼ vidzə̀m ve à du sho.

¹²Sí wíy a ker wò e kiwo fo à tín kiwuú é tiy.

¹³À wíy a koʼrí aàbvərə̀ʼ wùn aàbúví kitu, a nyèŋrì wón abvərə̀ʼ wùn à yó si.

¹⁴Nyùy suuy jii, «M wíy bòyìr wír wo wù tíy e mǒ wùn, koŋ mo, a kìŋsìn wír wo wù bínsi mo ji Nyùy.

¹⁵Wù wíy toŋ e mò, é m yú tóŋ rə́, a dzə vèr wun e ghan sé ŋgeʼ. M wíy fəə́r wun fo ŋgeʼ, e bùʼ e vijuŋ vi.

¹⁶M wíy laamé wun e dzəʼə̀m ye dáa, e dìn wun ji m dzə̀ Ŋgaà Lùŋèr və.»