Read Lamnso Nsùyrì Nyùy 92 Bible Online

Nsùyrì Nyùy 92 - Lamnso bible

Nsùyrì Nyùy 92

¹[114] Kí dzə̀ kijuŋ fó a beèrì NYÙY TÀR. Kí bòŋ feyì ji á wáa yòv, a wùʼsì yír yé, Nyùy, wò woo Taà Vitu,

²a fìʼtì vijàvndzə vidzə̀m mo à koŋ wír vé e ŋàŋ, a fìʼtì vitsə́ʼə́ mo à yii tíy vèn áwune, e dù, e jòʼsì.

³Á kú a yòv, a kùm lúŋ, à yé nshìí shó, a kùm, a yu viléŋléŋ vé luŋ.

⁴NYÙY TÀR, à yiì ne, m wáa sheʼrí bìʼ lim sé se ghaʼtín sí, a m yov, shéʼri bìʼ vinyo ve ghaʼtín ve à yiìn.

⁵Rúrú, NYÙY TÀR, lim sé si dzə̀ sigháʼtín, a kwaʼtì yée shoò é ŋàŋ.

⁶Viyúŋ ví yòʼ dzə̀ ví kìíy, a bó yòʼ dzə̀ sá alàvifií kìíy jii,

⁷mo wír ve á méŋ Nyùyi fə̀m kúy moo vikwiíy, a wír ve á kér yii ye bií kuʼkìr kùʼkìn ben, áwune kù wíy lày a ŋkuuŋkùŋ.

⁸Éè NYÙY TÀR, à kù wíy a tiy ké vitú, e dù, e jòʼsì.

⁹Vèr kì ji aŋgaà vé vibàné wíy kpukír, aà wíy so vé yiì ye bií, e taʼár áwune.

¹⁰À tàvír ne mo, m táv moo nyar, e bùʼ mo e kishéʼrì ki.

¹¹M yèn ne e sí yémé mo á soon aŋgàa vibàn vém, e yù mo wír ve á méŋ wòo tóŋninè.

¹²Wír ve á yúnin Nyùyi wíy a tèʼ moo ruʼ, a kuy moo kicí ké *sidar keé Lebanon.

¹³Áwune dzə̀ moo kicí ke á bìyìn e NYÙY TǍR lav, a kí teʼ ji bòʼrì bòʼrì e wun taakìbùʼ.

¹⁴Kí wíy lòo dzə̀n, é kí kú a koóm koomén, a ker mendzə́v é ŋàŋ, a səəné ji lìŋ.

¹⁵Kee shooy ki din ji NYÙY TÀR yii vinyo là kiloʼ. Wù dzə̀ kikiŋ kém, a bó wù yòʼ kér yii ye bií.