Read Lamnso Nsùyrì Nyùy 94 Bible Online

Nsùyrì Nyùy 94 - Lamnso bible

Nsùyrì Nyùy 94

¹Éè NYÙY TÀR, wò wo à yii siir ŋkfə́tír, ku dìn dòʼshwiiy wò.

²Dzə̀ wò wo à sáʼ kinyo ke wìr dzə̀m. Ku fò vé kiŋkoʼòrwùné vilaámé ve dzəə̀n vév.

³Éè NYÙY TÀR, ké wìr ve á méŋ wò, áwune wíy màʼ kinseŋ, e dù, e meé e le?

⁴Áwune kóʼor wún, súŋnin, dzəv nsaŋ.

⁵Éè NYÙY TÀR, áwune laar wír vé láarin, nyavrì aáwune, aá dzə̀ wír vé ve ntayi.

⁶Áwune seéri vikǐy ŋkfə wùn aàbeèshàa, yúyri wón aŋkfə, suuy jii,

⁷«NYÙY TÀR yòʼ yén kinyo ke vèr yii. Wun woo Nyùy wìr veé Isray yòʼ gwarìr kinyo kér.»

⁸Ven ve vifií ví dzəə̀n a dzə̀ é kiroʼtí, vèn wáa kiíy vinyo vi. Ven vee viyúŋ, vèn wíy a ker vifií a dzə̀ é ghàn ka?

⁹A dzə̀ Nyùy wo wù‑uù bomen vituʼùr, la wù yòʼ a yu vinyo à? A dzə̀ wun wo wù‑uù bomen sí, la wù yòʼ a yen virə́ʼ a?

¹⁰A dzə̀ wun wo wù yii sər vitúm, wù kfə̀n yàr fóo kàntì à? A dzə̀ wúnwun wo wù yéʼey wíri vifií, wù kfə̀n bùŋ vifií á?

¹¹NYÙY TÀR kì vinyo ve wìr kwaʼtì vidzə̀m, a wù kì ji ví dzə̀ á shwér.

¹²Éè NYÙY TÀR, bòŋ ké wìr wo à sərì, sər ŋgaàŋ, li nsər yè, tír wun sho.

¹³À tír wun ji à fíʼ a fo wun meemè e ghan sé ŋgeʼ, e meé mo wò‑óò yii, é wír ve á méŋ wòo li é kitam.

¹⁴NYÙY TÀR yòʼ yii maʼày wír və́, a bó yòʼ dzə̀ wù bìn ndzə̀m aáwune, áwune, ve dzəə̀n vitsə́ʼ və́.

¹⁵Wír ve á tínen nsaʼa wíy lò, a ghán sí gheén ne, aá kfə́n a tinén nsaʼ a dzə̀ é nsànloŋ. Á tínenè, é wír ve á yii réŋé wáa tomrí.

¹⁶Wìr wóo sə mo fo wír ve bií dzə̀ shó à? Wìr wo wù fəər mo fo áwuné wo dzə̀ la?

¹⁷A là fo NYÙY TÀR‑iì dzəə̀n ŋgaà wom sə, bo mò‑oò sì áàŋkfəə́ wòŋ ŋkuuŋkùŋ.

¹⁸Éè NYÙY TÀR, mò‑oò lóo kwàʼtì ji m sì é shùu kpu, à kù sə̀ mo bìʼ koŋ ye à yii kér fo wír vée.

¹⁹M lóo yaŋyáŋ, lóo dìy wún, à kù a loʼtí mo, shilív shém shí wàa rə̀sìn.

²⁰Bó yòʼ dzə̀ à suùsín kiwó vèn aàtǎr saʼa, atǎr saʼ, ve á sə́ kòyàr, li nsər, nəʼsì wíri shó nə́ʼsin.

²¹Á lo, á bàʼtí, a ròn wuú wìr ve á yúnin wò, bin nsaʼ ji á yúyrí alànjò.

²²Yii bèy, NYÙY TÀR dzə̀ kirə́ʼ kém ke tavín kí, dzə̀ wun Nyùy wom, a dzə kirùmèn kém ké nsàm.

²³Wù wíy siìr vinyo vév ve bi ví aáwuné kitu, e laàr áwune bìʼ yii yév ye bií. NYÙY TÀR woo Nyùy wòsən kù wíy laàr áwune.