Read Lamnso Nsùyrì Nyùy 96 Bible Online

Nsùyrì Nyùy 96 - Lamnso bible

Nsùyrì Nyùy 96

¹Á wáa yòv luŋ wo fíyi, a burí NYÙY TÀR. Wìr dzə̀m woó kitu ke nsay wáa yòv luŋ, a yòv, a sùyrì NYÙY TÀR shó.

²Á wáa yòv luŋ, a wùʼsì yír NYÙY TÀR, a fìʼtì kishiíy kidzə̀m mo wù luŋèr wíri.

³Á kú a fìʼtì vikuʼùy və́ e vitúm vi vidzə̀m, a fèr viŋgaʼnìn ve lìm ve wù yii, é wíri yú adzə̀m.

⁴NYÙY TÀR dzə̀ e gháʼtín, a dzə̀ á wàa burí wun feyì. Á wáa ghvəm a dzə̀ wun, e shaà anyùy.

⁵Anyùy ve vitúm vi cúu kù dzə̀ mebvə̀m mebvə̀m. Yii bèy, a NYÙY TÀR dzə̀ kfə́, a yì‑iì bòm wun yúv.

⁶Wù kù dzə̀ wùn à viwìr vi, à vikuʼùy ve ghaʼán ví. Lav rə din vitaáví və́, kfə̀n din mo wù bòŋèn é ŋàŋ.

⁷Ven vee wír veé kitu ke nsay adzə̀m, vèn wáa kwa NYÙY TÀR, a binsí vikuʼùy wùn à vitaáví və́ ví.

⁸Vèn wáa kwa wun, a sùyrì yír rə́ ye ghaʼáné, a wìy e cúu, a nəə́ sho e wun taakìbùʼ.

⁹Wù bvə́yí, vèn tsə̀m é si wo, e fò ghvə́m e wun. Ven vee wír veé kitu ke nsay, vèn wáa fàn, a yàʼ e wun si.

¹⁰Vèn wáa suúy e vitúm vi jii, «NYÙY TÀR dzə̀ Fon.» Rúrú, kù tùúy wun kitú ke nsay, a bó yòʼ dzə̀ kifá ki sə̀ʼsì. Wù wíy a saʼ vitúm, a tinén vinyo vév a dzə̀ é nsànloŋ.

¹¹Yúví kú a sheʼrí, é nsay wáa yu vijuŋ. Rìbà ndzə̀v wáa yòrkìr, à kifá kidzə̀m ke kí dzəə̀n shó ki.

¹²Kwáʼa wáa sàvnìn, à kifá kidzə̀m ke kí dzəə̀n shó ki. Vicí veé kòv vidzə̀m vi wáa yòv luŋ, a sheʼrí NYÙY TÀR.

¹³Á kú a sheʼrí wun, bìʼ fo wù sí wiyì, a wù wiy ji wun sáʼ kitú ke nsay. Wù yíi a saʼ kitú ke nsay là kiloʼ, a saʼ vitúm e suuyrú və.