Read Lamnso Nsùyrì Nyùy 97 Bible Online

Nsùyrì Nyùy 97 - Lamnso bible

Nsùyrì Nyùy 97

¹NYÙY TÀR sáʼ vifon, wìr msòŋ woó kitu ke nsay wáa sheʼrí. Á wáa sàvnìn, à veé shuù se rìbà ndzə̀ví shó.

²NYÙY TÀR laynìn e mvə̀m mbàʼ ye sənér. Wù laynìn e ndzə ye yì sə́n ji cùm, sáʼ vifon e dzəə yee tìítiy, là kiloʼ.

³Wù tsə́nsi və́y e wun mbìy, wú wàa tòn aŋgaà və́ vibàn virə́ʼ vidzə̀m.

⁴Kishèv kfə́ kí wàa ŋwàŋ, fóo wàa ran, kitú ke nsay ki wàa yen, a yàʼ.

⁵Agwane yaáne moo ghám vilù e NYÙY TǍR si. Á kù yaáne yaànén e wun woo Taà Ndzə si.

⁶Yúví din ji NYÙY TÀR dzə̀ là kiloʼ, a wìr msòŋ yén vikuʼùy və́.

⁷Woómé si koò ne wir dzə̀m wo wù ghvə́m vibámmbó, wir dzə̀m wo wù kóʼor wún áànyùy kisaŋe, bìʼ fo anyùy adzə̀me kù kér fó a gvəʼtí e NYÙY TǍR si, a sùyrì wun.

⁸Wír veé Sione yù ne, a yu vijuŋ, ŋkà se laʼ seé Juda si yù ne, a sheʼrí. NYÙY TÀR, á shéʼri nsaʼ se à tinen, e fò aáwune.

⁹Rúrú, dzə̀ wò Taà Ndzə wo wù sáʼ kitú ke nsay kidzə̀m. À kér vitaáví féyì, e shaà anyùy adzə̀m.

¹⁰Ven ve á koŋ NYÙY TÀR, vèn wáa bàn kinyo ke bi kí. Wun woo NYÙY TÀR yii kiŋsìn dzəʼə̀m wìr və́. Wù yii fəər áwune fo wír ve á méŋ wuné wo.

¹¹Wír vəə́ wáa sheʼrí wun mo á shéʼri ndzə ye yì ráné. Wír ve melív mev mè dzəə̀n tìítiyi wáa yu vijuŋ adzə̀m.

¹²Ven ve á yúnin NYÙY TÀR, vèn kú a sheʼrí wun. Vèn wáa kuumé lim se wù lìmèn e vèn sí, a beèrì wun wo wù dzəə̀n e ránén.