Read Lamnso Nsùyrì Nyùy 98 Bible Online

Nsùyrì Nyùy 98 - Lamnso bible

Nsùyrì Nyùy 98

¹[115] Á wáa yòv luŋ wo fíyi, a burí NYÙY TÀR shó. Á wáa burí NYÙY TÀR wo wù yiìn viŋgaʼnìn ve vinyò. Wù‑uù fə̀ə́r vitaáví və́, wun moo Nyùy, e màʼ aŋgaà və́ vibàn e kóy və́ wo tavíné.

²NYÙY TÀR yiì ne, wíri yén mo wù sə́ wír və́. Wù dìn ne e vitúm vi mo vitaáví və́ ví dzəə̀n, e dìn mo wù yii vinyo və́ tìítiy là kiloʼ.

³Wù kù‑uù tíy e wun jì, din koŋ rə́ e wír veé Israyi. Buú se ndzə sidzə̀m si yèn ne nsiì Nyùy wòsən.

⁴Wìr msòŋ e dzə̀m, vèn wáa ndzəʼ NYÙY TÀR e kishéʼrì ki. Vèn fəə́r yòv kisheʼrì fo shuù, a sùyrì wun sho.

⁵Vèn wáa kùm lúŋ, a yòv, a burí NYÙY TÀR. Vèn wáa burí wun e luŋ se nsùyrì si.

⁶Vèn wáa toŋ sóŋ, a fer loŋ, a yòv, a ndzəʼ NYÙY TÀR woo Fon.

⁷Rìbà ndzə̀v wáa yòr, à kifá kidzə̀m ke kí dzəə̀n shó ki, é kitú ke nsay ki wáa sə̀ʼ mo yov wíri luŋ. Kí kú a sə̀ʼ, à wìr msòŋ wo wù dzəə̀n shó.

⁸Ndzə́ví wáa liynín, a fo kiléŋléŋ ké wo ye kwaʼáné, áàgwane wáa yiì mo yov wíri luŋ e kintatì wùn à kishéʼrì ki.

⁹Á wáa yòv, a səəsí NYÙY TÀR, wun, wo wù wiy ji wun sáʼ á kitú ke nsay. Wù wíy a saʼ wir dzə̀m e dzəə yee réŋ, a saʼ vitúm e dzəə yee tìítiy, là kiloʼ.