Read Lamnso Nsùyrì Nyùy 99 Bible Online

Nsùyrì Nyùy 99 - Lamnso bible

Nsùyrì Nyùy 99

¹NYÙY TÀR sáʼ vifon, vitúm vi kú a fàn, a yàʼ. NYÙY TÀR dzə́ e kàvàʼ, e *vifá veé yuv ve ví kér vav si ví nsàn, kitú ke nsay ki kú a sə̀ʼsì.

²NYÙY TÀR dzə̀ e gháʼtín é Sion. Dzə̀ wun wo wù kér vitaáví fo vitúm vi vidzə̀m.

³Á kú a burí yír rə́ ye ghaʼtíné, yír ye wìr yú, tímé kpù, e rə̀. NYÙY TÀR dzə̀ e ránén.

⁴Fon wo ghaʼtín, wò wo à koŋ kinyo a dzə̀ kee tìítiy, à tùúy ne kinyo keé nsànloŋ e Isray. À yiì ne, wíri wáa yiì vinyo tìítiy, a dzə là jay.

⁵Á wáa koʼór NYÙY TÀR woo Nyùy wòsən. Á wáa gvəʼtí e wun ghaa kàvàʼ, a ghvəm wun. Wù dzə̀ e ránén.

⁶Mooser wùn Aaron‑eè dzə̀ wír fo atàá cù vəə́ mvəm, Samuel wáa dzə sa wír fo ve vé‑eè li kilíŋ ke wíri, bunrì. Áwune‑eè tòŋ e Nyùy, wù yú tóŋ yév.

⁷Wù nèn sùŋnín aáwune fó mvə̀m mbàʼ ye yì dzəə̀n é njà kitom, áwune lém kinyo ke wù‑uù foon wùn à sáʼ rəə́.

⁸Rúrú, NYÙY TÀR woo Nyùy wor, wò‑oò lo bìnèr kinyo ke wír vée‑eè tóŋ e wò. Wò‑oò dìn ji à dzə̀ á Nyùy wo wù yii laysìn ajay wíri, yii bèy, e kù fò áwune ŋgeʼlàʼ, bìʼ yii yév kisaŋe.

⁹Á kú a koʼór NYÙY TÀR woo Nyùy wòsən. Á wáa cù wun e wun gwan wo ranén. NYÙY TÀR woo Nyùy wòsən dzə̀ féyì e ránén.