Read Lamnso Ŋgàn 1 Bible Online

Ŋgàn 1 - Lamnso bible

Ŋgàn 1

¹Ŋgàn se vé‑eè baʼtin e Solomon woo fon woó Isray yir,[1] Solomon woo wan Fòn Davir.

²Ŋgàn sìn si dzə̀ ji sí fiʼ mvə̀ʼ vifií vé wìr msòŋ, a dànèr mo wù wáa ghan, a yu ntir se afiì, a kiíy mvə́m.

³Sí yíi a yeʼéy wun, é wù wáa tiír kiwuú kfə́, a fìʼ, a yiì vinyo ve ru ví, a tinén vinyo e nsànloŋ, là kiloʼ.

⁴Ŋgàn sìn si yíi a yeʼéy anjìʼ, aá wáa ker vifií, a mvə̀ʼtì vifií vé wàʼbìn, aá wáa kiíy mó a tàr vinyo, a shoʼ ke juŋ ki.

⁵A dzə̀ fiì yuùrí sá ntir sìn, sí wàa yeʼéy wun, wìr wo wù kiiy jeéyjeéy fó vinyò wàa ker ntir ye juŋ fo fo,

⁶a kiíy mó a toʼtí ŋgàn si wùn à mbìamè wo yovìn, a kiíy jí se afiì wùn à metìítìy mev mè.

⁷Wìr lóo ghvəm NYÙY TÀR, bo wù sí yiì a kiíy vinyo. Yii bèy, kiyúŋ kí ŋwáy kfə́ ntir, tén fó a jùmrì vifií.

⁸Wan wòm, ku yuùrí ntir tàr won,[2] lá à yòʼ ŋwày yéʼéy ye yè won fó e wò.

⁹Yéʼéy yéví dzə̀ moo tán ye yí boŋèr kitú ké, a dzə moo shàŋ wo wù boŋèr kilòŋ ké.

¹⁰Wan wòm, a wír ve á yii vinyo ve bi vií lò, a bayír wò, lá à yòʼ suùsín vèn áwune.

¹¹Aáwune lò, a kwàr wò ji à wiy, é vèn áwune téʼ wír, e yùyrí, vèn áwune ku tèʼ á wír wo bó wù yòʼ kiìn fo kí binè, e yuyrí kisáŋ, à wàa yen fó mùm.

¹²A tàm á yiì a suúy ji bó yòʼ dzə̀ á yùyrí ntéŋ, aáwune fə̀m tàvkír moó le, a dzə̀ á kù dzəə̀mè a áwune atin, aáwune du áàŋkfəə́ wòŋ.

¹³Vèn áwune waà yíi kuúy a vifá vigháʼán, e bòm e věn melav.

¹⁴À ku tàtí a ŋgoo yev, aá wìy a jàv nyanyày vifa.

¹⁵Wan wòm, aá lò a yòŋ bèy, lá à yòʼ shèm ŋgoo yev. Tín kiwuú kí fo áwuné bàm.

¹⁶Wír ve bi víne yòʼ tíytiy fóo yiì kinyo ke bi kí. Áwune kù dzə̀ kibáʼtín fó teʼ wír, e yuyrí.

¹⁷A wìr wáy ntàŋkìr e shinə́n shí si, bo dzə̀ kisáŋ.

¹⁸Yii bèy, wír vìne kù wáy kitám a dzə̀ kév, aá káv a dzə̀ yév yee kpú.

¹⁹Á mo ké wìr ve á kooy séʼ mensə ki dzəə̀n. Séʼ wov kù yíi bìnkìr, e laàr dzəʼə̀m yév.

²⁰Vifií ví fúŋ jí se ntir, nan jí e mentàrnín, fúŋ moo wiíy wo wù tóŋ, táŋ kinyo e wáynjáŋ.

²¹Ví kù fúŋ fo atǎr wòŋe tínen nsaʼ seé wòŋ, fúŋ e mentàrnín fo màŋgòŋ ko.

²²Ven vee anjìʼ, vèn wíy jìʼ bèn, e dù meé e le? Ven ve á jaʼ wíri, vèn wíy jàʼ, e dù, e meé e le? Ven vee viyúŋ, vèn wíy keerí vifií é ghàn ka?

²³Vèn binkir, e yuùrí ntir ye m fó e vèn. M yíi way vifií vém e věn kitu, e yiì, é vèn wáa dzə afií.

²⁴Mo m rə́si tír ven, a vèn tén fóo yu, kwar ven, a bó wìr yòʼ kér ghán,

²⁵a vèn kù ŋwáy ntir sém ŋwayín, tén naarì ye m naarì ven,

²⁶bo ŋgeʼ si yíi nəə́ ven, é m wáa sheʼ ven shéʼén. Vèn yíi a fàn, a yàʼ, é m wáa te a dzə̀ lám.

²⁷Fane yíi sùm ven é njà kinsəm, é ŋgeʼ si sum ven moo kiìkir. Vèn lóo buʼ, lóo kfər sóŋ, é m wáa sheʼ ven sheʼén.

²⁸Ŋwàáy, wír vìne wíy a yòŋ mo, é la m yòʼ a ghay. Á wíy a tàʼ mo e waá shuù, e làa yòʼ a yen.

²⁹Áwune tèn ne fó a yeʼéy, e kiíy, á tèn ne fó a yunín NYÙY TÀR.

³⁰Ntir yem yòʼ dzə̀ aáwuné kitu fə̀m e mòʼón, á ŋwáy vinyo ve m naarì áwune shó ŋwayín.

³¹Áwune kù yíi kav kifa, a dzə̀ ke á wayin, liì kisaŋ wov kù yíi bìnkìr aáwuné kitu.

³²Anjìʼi tén fóo yu ntir, á lì a dzə̀ yév yee kpú. A viyúŋ ví səŋ wún, bo ví yúyri a dzə̀ vitú vév.

³³Yii bèy, wìr wo wù yú mo, wíy a dzə dzə́ yee nyaáŋ. Wù wíy a dzə e kiŋsìn, là kinyo ké a fàn.