Read Lamnso Ŋgàn 10 Bible Online

Ŋgàn 10 - Lamnso bible

Ŋgàn 10

¹Ŋgàn se Solomon si sìne. Wàn lóo ker vifií, kitàr kí wàa yu vijuŋ, yúŋsi, wù wày kiyìy é nsòv.

²Vikuʼùy vee koóy é dzəə ye bi ví yòʼ kér séʼ, yii bèy, yúnín Nyùyi dzə̀ wùn à dzəʼə̀m ye dáa.

³Wìr yúnin NYÙY TÀR, la wù yòʼ màʼtì wun e jìŋ, wìr méŋ Nyùy, wù wàa sətí dzə́ə sə́.

⁴À njoó, à kpù é nembuŋ, táví, à kpù é nefùʼ.

⁵Wan wo wù sə́ yè wov é ghan sé ŋkav vifa dzə̀ wo wù kér vifií, wo wù buúne e ghan se vifá vi biyin, shoor tàr wov.

⁶Wìr yú Nyùy, wíri wàa burí liì və. Wìr méŋ Nyùy, wù kù a meér a dzə̀ jí se bi sí fó shuù.

⁷Wìr boŋ e liì, wù kpù, e gòʼ e njèm, bír e liì, á dzəə̀mè, e lò fo kitu wo.

⁸Wìr lóo ker vifií, wù wàa yu ntir, lóo dzə njìʼ woo ŋgaà kiyòr, wù kfə̀r kitú.

⁹Wìr lóo ker yii ye juŋe, wù kìŋsìn kitú, lóo ker yé kisaŋe, wù gbù e Nyùy kitam.

¹⁰Wìr kív sí, bo kí kù yíi jòʼsì a dzə̀ é ŋgeʼ. Njìʼ lóo yòr yòrìn, wù wày kitú kfə́ é ŋgeʼ.

¹¹Wìr yú Nyùy, fəər jí, sí rəə̀r wír, méŋ Nyùy, fəər jí, sí màʼ melaà.

¹²Vibàn ví lo, ví yìm kitáŋnìn, kikoŋnìn ki màʼ kimán.

¹³Á kiiy fií bìʼ kisúŋnìn. À yav lám, ŋgwàne toòmé wò.

¹⁴Fiì dzə̀ yú lèm. Kiyúŋ kí lem shuu e rə́, kí kfə̀r kitú.

¹⁵Káv ŋgaà mbàme kiŋsìn wun, mo kitan ki bívir dzəʼə̀m ŋgaà kitàn.

¹⁶Wìr yúnin Nyùy, wù wàa ker dzəʼə̀m ye juŋe. Wìr méŋ Nyùy, wù wàa ker liì a dzə̀ wo bi.

¹⁷Wìr yuúri ntir, wù bònen shìíy, ŋwáyí, wù bìn é dzəə ye bi.

¹⁸Bàn, e lìtì dzə̀ ŋgaà kimboʼtì. À bívir yír wìr, à dù é kiyuŋ.

¹⁹Wìr lóo yàv jí, wù wàa jay vinyo. Mey lám, bo á fií lèn.

²⁰À yúnin Nyùy, kiláyláy ké ki wàa bòŋ wíri é ŋàŋ. À méŋ wun, bo ndzə̀né yòʼ dzə̀ə́ e kinyò ke à kér e vifii.

²¹Wìr yúnin Nyùy, wù yìír ŋgòŋ e jí si, du e kiyuŋ, wù kpù kibúŋ ke vifii.

²²Kisəəvì ké NYÙY TÀR kí dzə̀ vikuʼùy, a bó wù yòʼ yii bár mendzən sho.[12]

²³Yú kiyúŋ vijuŋ e kinyò ke bi kí. Wìr fiirì, wù wàa yu vijuŋ ve njiìn wo juŋ.

²⁴Kinyo ke wìr wo wù méŋ Nyùy, fanè, kí kù yíi koóy wun, a ké wìr wo wù yúnin Nyùy ki dzə̀, a wù kù yíi a ker ke shilív sə́ shí tíy sho.

²⁵Kinsəm ki kù baʼ a dzə̀ wír wo wù méŋ Nyùy, a wo wù yúnin wun, tíy kfə́ kitávín ji ŋkǐŋ.

²⁶Mo kiŋkway ke melùʼ ki yúy sóŋ, a kindzə́ʼ ki báy sí, kù dzə̀ sá mo njoó yii, a shilív shé tàr wov lìm shi nyárí.

²⁷À yúnin NYÙY TÀR, dzəʼə̀m yée yiì wàa dzə e da, méŋ wun, yí wàa dzə e tsə́m.

²⁸À tiir vifií e Nyùy wùn, yúnin wun, à jòʼsì é vijuŋ. À méŋ wun, kinyo ke à tiir vifií shó ki tàʼrí, e lày.

²⁹Nyùy kiŋsìn wír ve á tíy tìítiy, laar ve á méŋ wun láarin.

³⁰Bó kifá ki yòʼ wíy sə̀ʼsì wír ve á yú Nyùy, aá wíy fəə́r wír ve á méŋ wun fəərín fó wòŋ.

³¹Jì wìr wo wù yúnin Nyùy dzə̀ ntir, aá kù wíy sətí shúu ŋgaà kimboʼtì sə́tín.

³²Wìr lóo yunín Nyùy, wù kìíy jí ye juŋ, méŋ wun, wù kòytí kimboʼtì.