Read Lamnso Ŋgàn 11 Bible Online

Ŋgàn 11 - Lamnso bible

Ŋgàn 11

¹NYÙY TÀR ban mfìʼ vidzəə̀sì mbóʼmé, shéʼri mfìʼ yee réŋ.

²Wìr kóʼor wún, wù màʼ kitú, li kitú kfə́ shishàr, wù wàa ker vifií.

³À lóo tiy tìítiy e Nyùy kinyò, liì wò wàa dànèr wò, bóʼti kimboʼtì, kí bìvír wò.

⁴Vikuʼùy ví yòʼ yíi sə wò e kishiíy ke Nyùy sáʼ nsaʼ yè. Yii bèy, a yúnín Nyùyi dzə̀ wùn à dzəʼə̀m ye dáa.

⁵Wìr lóo dzə là nsem, yii rə́ ye réŋé kìŋsìn wun. Wìr méŋ Nyùy, wù gbù e wun yiì ye bií.

⁶À lóo tiy tìítiy e Nyùy kinyò, yii yé ye réŋé wàa bòyìr wò. Yii bèy, a shii ŋgaà lám baà kù sì kitám kfə́.

⁷Wìr lóo meŋ Nyùy, wíy kpú, vifií ve wù‑uù tiirin é vifa vi bvəə̀rí, bùʼ wo wù‑uù wáy shilív shó lày kisáŋ.

⁸À yúnin Nyùy, à bòy fó ŋgeʼ, méŋ wun, à nə̀ə́ shó nəə́n.

⁹Wìr wo wù méŋ Nyùy lo, wù lòr ŋkar rə. Yii bèy, kiíy wìr wo wù yú Nyùyi dzə̀ yí bòyìr wun fo fo.

¹⁰Wíri yúnin Nyùy, kuʼkìrì, ŋkàlaʼ wàa yu vijuŋ. Wíri méŋ Nyùy, kpúkirì, ŋkàlaʼ wàa seŋ.

¹¹Nyùy buʼ wír və́, yír ŋkàlaʼa nànèn. Wíri méŋ Nyùy, á tòn ŋkàlaʼ e shúu.

¹²Wìr wo wù káy wíri buu a dzə̀ vifií, a wìr wo wù kim kiliímé kfə́ dzə̀ fií.

¹³Ŋgaà viduu fer vilìtì ve vinyò, a wìr jwáʼ lem kfə́ lémen.

¹⁴Kitúm ki buu vé ntiri, kí gbù. Vé ntiri lóo dzə anín, bo nsiì dzə̀ é kiwo.

¹⁵À tiim mbìy ji kiŋgwìy ki foo mbàm, bo ŋgeʼ kù dzə̀ ye. À tén, bo à bòy ne.

¹⁶Wiíy tó sí, á wàa ghvəm wun, lùmèn kù a kàtìr kfə́ kátirin, e bóo kùʼ.

¹⁷À lóo sham wíri, à kàv vijuŋ, e wày é wùn. À lóo nyarnín, à kàv ŋgeʼ, e bàʼtí e kitu.

¹⁸Wìr lóo yiì yii ye bií, bo wù yòʼ yíi a ker séʼ, lóo yiì yii ye juŋe, bo vilaámé və́ ví kù dzə̀ é kiwo.

¹⁹Wìr yii yii ye juŋe, wù wàa ker dzəʼə̀m ye dáa. Wìr wáa yiì ye bií, bo wù kù taʼ a dzə̀ kpú rə́.

²⁰NYÙY TÀR yii ban ayìíkum, shéʼri wír ve á ghán e wun mbòv.

²¹Á kiíy ji á kù wíy màʼ ŋgeʼ e ŋgaà yiì ye bií kitu, a wìr wo wù yú Nyùy kù wíy shaàrì.

²²Wiíy tó sí, lóo yiì vinyo vee là vifií, bo wù sì moo ndzə̀ŋgwáŋ woó kilùm wo á wayin e kǔnnyàm yuy.

²³Wír ve á yúnin Nyùyi dzə̀, aàntaŋ véví wiy e vijuŋ vi, a ve á méŋ Nyùyi dzə̀ kév, a kwaʼtì yéví tínsin Nyùy tínsín.

²⁴Wìr wùmòʼ dzə̀, a wù kér wó rə́ tèéter, a Nyùy səəvì wun sə́əvin. Wùmòʼ wáa dzə kfə́, a wù gímti gìmtín, e kù tò a dzə̀ é kitàn.

²⁵Wìr lóo fo kicaárín, vikuʼùy ví wàa nəə́ wun. Mo wìr sə́ wíri, kù dzə̀ sá mo á yíi sə sa wun.

²⁶A jìŋ ghàʼ, wìr wáa ker vifá ve yi, e fìn e kitàv, wíri shòv wun. Wo wù fəərin və́ fəərín é way, wíri wàa burí wun burín.

²⁷À lóo ker njiìn wo juŋ, wíri wàa kòŋ wò. À wáa tàʼ melaà, à yèn melaà.

²⁸Wìr wo wù tiir vifií é vikùʼùy, kù yíi gbù gbuùn. A wìr wo wù yunín Nyùy, kù yíi a bòʼrì kfə́ bóʼrin moo kicí ke á bìyìn é ghaa ndzəv.

²⁹Ŋgaà melaà e kfəə yòʼ wíy yi vitsə́ʼ vé kfəə. A wìr yúŋsi yùŋsín, wù kfə̀n ji kwǎn fiì.

³⁰Wìr wo wù yúnin Nyùy dzə̀ moo kicí ke wíri kfə́rí, á lùŋ fó fo. A wìr wo wù yii ji wíri luŋ, dzə̀ wo á bínsi ji wù kér vifií.

³¹A Nyùy laáme wír ve á yúnin wun, laáme, aá dzə̀ə́ e kitu ke nsay, bo ké wìr ve á méŋ wun ki wíy a dzə e le, áwune ve á dzəə̀n aŋgàa yiì ye bií?