Read Lamnso Ŋgàn 12 Bible Online

Ŋgàn 12 - Lamnso bible

Ŋgàn 12

¹Wìr wo wù koŋ ntir, sí koŋ kiíy, a wìr wo wù ban naarì dzə̀ kiyúŋ.

²NYÙY TÀR bínsi wír, a dzə̀ ve á yú wun, maʼ ŋgeʼlàʼ e wír ve á bá antaŋ ve bií kitu.

³Bó yòʼ dzə̀ wìr tìím e Nyùy si, a wù buʼtì vinyo ve bi ví. Yii bèy, wír ve á yúnin Nyùyi kù tíy kév ji ŋkǐŋ.

⁴Wiíy lóo ker njiìn wo juŋ, wíri wàa ghvəm lúm və, lóo shoór lúm və, wù kfə̀n ji kiváv ke kí səə kighvə́r ké lum və.

⁵Wíri yúnin Nyùy, á gwàrìr vinyo ve réŋ ví. Wíri méŋ Nyùy, á wàa tiy a dzə̀ é kimboʼtì.

⁶Ntir wìr ve á méŋ Nyùyi dzə̀ kitám ke kinjuyrì, a wír ve á yú Nyùyi luŋèr kév wíri lúŋerin.

⁷Nyùy laar dzəʼə̀m wìr ve á méŋ wun, bo kév kí kù mày ne, a melav me wìr ve á yii mo Nyùy taʼà mè kù tíy fo ji ŋkǐŋ.

⁸Wìr lóo yiì vinyo ve ví kér vifií, wíri wàa burí wun. Wìr lóo yiì kinyo kee là vifií, wíri wàa kay wun.

⁹Bòŋ ké wìr wo wù kér kéŋ shishàr, wù kù kér wánlè lìm və, e shaà ké wìr wo wù kóʼor wún, shiiy e jìŋ.

¹⁰Wìr woo tìítiy kù yii leey fo nyám sə́ sí kijuŋ. A wo bi nyavrì e sə́ sí nyávrin.

¹¹Wìr shev súm və́ kijuŋ, wù kùʼ é viyikìr, lóo jùmrì vinyo ve vinjeenjèm, bo wù dzə̀ kfə́ kiyúŋ.

¹²Wír ve á méŋ Nyùyi siíme bùʼ aŋgàa yiì ye bií, a Nyùy kù fó dzə́ə kòóy e wír ve á koŋ wune.[13]

¹³Wìr méŋ Nyùy, wù kpù fo wun shuù, wìr yúnin Nyùy, wù bòy fó ŋgeʼ.

¹⁴Jí se ru sí kù dzə̀ wùn à vilaʼày və́ ví, réŋréŋ mo ŋgaà lìm kù yii dzə́ sa wùn à vilaʼày və́ ví.

¹⁵Kiyúŋ kí lóo yen kfə́ ji dzə́ə sə́ sí dzə̀ tìítiy, fiì kù a yuurí kfə́ a dzə̀ ntir.

¹⁶Wúné kin kiyúŋ, à yèn dòʼshwíiy və, fiì ŋwày kfə́ liy ŋwáyín.

¹⁷Wìr tiim vinjen ve ru ví, wù sùúy kinyo kee réŋ kí. Wìr tiim vinjen ve kisaŋ vi, wù bòʼtí kimboʼtì.

¹⁸Lám wo bií lémer wír moo nyùy rə̀r ye á baàyìn, a kisúŋnìn ke fiì kí fer wír férin.

¹⁹Suuyrú kù yii tíy fo ŋkuuŋkùŋ, a kimboʼtì ki yòʼ yii tíytiyì.

²⁰Wír ve á bá menàŋ e wírí bàmé, dzə̀ aŋgaà lám baà, a vijuŋ vi kù yii dzə́ vé wìr ve á maʼ kimán.

²¹Ŋgeʼ si yii baʼàr wír wo wù yú Nyùy báʼarin, a ké wìr wo wù méŋ Nyùy ki dzə̀ kfə́ ji vinyo ve bi ví rún é wùn wó.

²²NYÙY TÀR yii ban aŋgàa kimboʼtì, shéʼri wír ve á yii kinyo là kiloʼ.

²³Fiì yòʼ yii din kiíy, a kiyúŋ kí kù din kiyúŋsì kfə́.

²⁴Wìr lim kitávín, wù wàa dzə kilìmbìy, wìr njoó, wù kfə̀n ji kwàn.

²⁵Kwaʼtìi kù dzə̀ wùn à kinjuùmé kí. Wìr fó ntir ye juŋ, wúné bvə̀rkìr wír.

²⁶Liì wìr wo wù yúnin Nyùy kù yii danèr ŋkar rə, a liì wìr ve á méŋ Nyùyi kù yii yii, a wíri jáy dzə́ə.

²⁷Ŋgaà jwim woo njoó koó nyám, la wù yòʼ bàv, a wìr wo wù yii kinyo, sə́ʼəmè dzə̀ wo wù yíi a ker kéŋ.

²⁸Wìr ghán e Nyùy mbòv, wù kòóy dzəʼə̀m. Wìr bin é dzəə ye sən, wù kù jòʼsì a dzə̀ é kpu.