Read Lamnso Ŋgàn 14 Bible Online

Ŋgàn 14 - Lamnso bible

Ŋgàn 14

¹Wiíy woo fií baʼrì nsaàlav rə, a woo kiyúŋ sàʼtì rə́ə e wóo.

²Wìr lóo dzə wir jwáʼ, bo dzə̀ wír wo wù ghvə́m Nyùy. Wìr lóo ker kiŋaamè ke liì, bo dzə̀ wír wo wù ŋwáy Nyùy.

³Kiyúŋ kí yav lám yávin, bo sì ŋgwàn və́ bey. Fiì kù kim kfə́ shuu, kiŋsìn kitú kfə́.

⁴Wìr buu ambòŋ vée tsəə́r e sum, wù bùú viyíkìr vée way e kitàv, wìr lóo ker mbòŋ wo tavín, wù kòóy viyíkìr nyanyày.

⁵Wìr jwáʼ tiim vinjen, wù sùúy suuyrú. Wìr kisaŋ tiim vinjen, wù bòʼtí kimboʼtì.

⁶Ŋgaà jàʼ jum vifií, làa yòʼ a ker. Wìr lóo səʼə́m, wù wàa ker kiíy cér.

⁷Á baàmè viyúŋ ví, bó yòʼ dzə̀ ví yèʼéy wò kinyo.

⁸Wìr fiirì, wù wàa kiíy jeéyjeéy fó vinyò, kiyúŋ kí lóo tav kfə́ ji wun kì, kí jày dzə́ə.

⁹Viyúŋ ví buʼtì vinyo, e làa yòʼ a ci, yii bèy, wír ve á yii réŋé diy kév a dzə̀ kimán.[15]

¹⁰Kù kiiy wír mo nyár rəə́ koó, à mo vijuŋ və́ ví koó, a bó yòʼ dzə̀ tókíshwáŋ, wù kìíy.

¹¹Wìr lóo tiy réŋ e Nyùy kinyò, lav rə wàa kuy, wìr méŋ Nyùy, lav rə bvəə̀rí.

¹²Wìr yén dzə́ə ji yee tìítiy, a yì kù jòʼsì a dzə̀ é kpu.

¹³Wìr lo, wù kù shèʼ é mvə̀m mendzə̀n, shéʼ, maysì, kù bèr mendzən.

¹⁴Aà yii yii ye bií, bo à wíy kav vibí, à wáa yiì yii ye juŋe, bo à wíy kav vijuŋ.

¹⁵Njìʼ biíme kfə́ kinyo kidzə̀m biímén, a fiì yii kinyo, sə́ʼəmè.

¹⁶Wìr wo wù kér vifií baʼàr ŋgeʼ, woo kiyúŋ kù a gùynìn, a to kfə́ shó toón.

¹⁷Ŋgaà dòʼshwiíy yòʼ yii sə́ʼəm e kinyò, ké wìr wo wù bá ntaŋ wo bi, kí dzə̀ aá ban bànèn.

¹⁸Kitsə́ʼ ké anjìʼ ki dzə̀ kiyúŋsì kév, a vilaámé vé fiì ví kù dzə̀ kiíy.

¹⁹Aŋgàa yiì ye bií wíy wìy, e tsəm ndzəə́ e vé yiì ye juŋé si, wír ve á méŋ Nyùyi kù wíy a gvəʼə́m e wír ve á yú Nyùyí shweesí, a màʼ wó.

²⁰Wìr lóo tàn, á bàn wun, à ŋgaà və shuù lav sho, lóo ker, wù kùʼ é ŋkar.

²¹A wìr ŋwáy ŋgaà shuù lav və, bo dzə̀ kinyo ke bi kí, wù wáa rər mendzən me ŋgaà kitàn, wù wàa ker kisəəvì.

²²À lóo ba ntaŋ wo bi, bo à fəə̀ ne fo ŋwàn. Aà báʼti a dzə̀ kinyo ke juŋ ki, bo dzə̀ mo á wíy a kòŋ wò, a sham.

²³Lìm kitávín kù dzə̀ wùn à séʼ, mo kiyor ki kù dzəə̀n wùn à kitan ki.

²⁴Ntáraʼ afiì, kù dzə̀ vikuʼùy ve á kooyì, a tán viyuŋé kù dzə̀ kiyúŋsì ke á yúŋsi.

²⁵Njen woo là kiloʼ luŋèr wíri, lóo dzə woo ŋgaà kimboʼtì, wù fiìnè wíri.

²⁶À lóo yunín NYÙY TÀR, bo wù sì kóy wó wo tavíné, e kfə̀n a dzə kikiŋ ke vèn à wón vée.

²⁷Yúnín yé a yunín NYÙY TÀRí dzə̀ ntoò ndzə̀v ye yì fó dzəʼə̀m, a yí kiŋsìn wír fo wù li é vitam ve kpu.[16]

²⁸Viwìr ve fòn vi dzə̀ wíri, a vifon vee là wíri ví lày kisáŋ.

²⁹À kiiy móo kfəmén e wò dòʼshwiíy, bo à dzə̀ fií, a wìr woo ŋgaà dòʼshwiíy dzə̀ kfə́ kiyúŋ.

³⁰Shilív shee nyaáŋ shí yii faŋèr wír, a kinsiimè ki reŋèr wír réŋerin.

³¹Wìr lóo nyàvrì e ŋgaà kitàn, bo wù kuu Nyùy woo ŋgaà mbom və, wìr wáa rər mendzən me ŋgaà kitàn, bo wù ghvə́m Nyùy.

³²Vinyo ve bi ve wìr wo wù méŋ Nyùy yii vi yíi màʼ wun, a liì wo juŋ wo wìr wo wù yú Nyùy yii, kù kiŋsìn kitú kfə́ kíŋsin.

³³Wìr wo wù kér vifií dzə̀ wo wù gwarìr vinyo kijuŋ. Wìr lóo dzə kiyúŋ, la wù yòʼ a kiíy kímóʼ kí ji vifií.

³⁴Yii ye juŋe yii kóʼor kitúm, jay kù a shoór kfə́ shoorín.

³⁵Nshìylav lóo lìm lim rə́ kijuŋ, fòn wàa kòŋ wun. Nshìylav lóo shoór lim yeé ntoʼ, fòn màʼ ŋgeʼ sho.