Read Lamnso Ŋgàn 16 Bible Online

Ŋgàn 16 - Lamnso bible

Ŋgàn 16

¹Ntaŋ wo baán dzə̀ kinyo ke wìr msòŋ, a binèri kù lo a dzə̀ fo NYÙY TÀR.

²A dzə̀ wìr wàa yen ji vinyo ve wun yii vi dzə̀ á tìítiy, yii bèy, a kù yén NYÙY TÀR shilív shé ŋgaàŋ.

³Aà wày lim yé e NYÙY TǍR kiwo, antaŋ vée wàa ghan kijuŋ.

⁴NYÙY TÀR lóo bom kifá, a wù kiíy ne mo kí yíi a dzə, fə̀m wír ve á méŋ wun, wù kù lèm ne kishiíy kév ké nsaʼ.

⁵Wìr lóo kùm kiŋkùm, NYÙY TÀR wàa bàn wun, rúrú, a bó áwune yòʼ wíy bòy fo ŋgeʼlàʼ.

⁶A wìr koŋ NYÙY TÀR, tíy e suuyrú, NYÙY TÀR wàa kòŋ wun. Wìr wáa ghvəm wun, ŋgaàŋ wàa bàʼàr yii ye bií.

⁷Yíi wìri lóo gheén NYÙY TÀR, wíri wàa gbù e wùn wó, fə̀m aàŋgaà və́ vibàné shó.

⁸Bòŋ e suúy suuyrú, a ker shishàr, e shaà fóo shwìv kinshwìv, a ker bùʼ.

⁹Ntaŋ wo baán kù dzə̀ e wìr msòŋ, a kù danèr NYÙY TÀR bo wù wáa yiì kinyo ke réŋ kí.

¹⁰Fòn súŋnin e Nyùy kiliŋ, a kinyo ke wù tínen fo wun shuù ki dzə̀ kee tìítiy.

¹¹NYÙY TÀR koŋ mfìʼ vidzəə̀sì yee réŋ, a kù siysì wun mo mfìʼ sidzə̀m si dzəə̀n.

¹²Fòn yii ban yii ye bií,[17] bìʼ fo sáʼ fòne yii tuuy a dzə̀ bìʼ yii yee tìítiy.

¹³Fòn yii koŋ e yu a dzə̀ suuyrú, shéʼri wír wo wù suuy suuyrú.

¹⁴A dzə̀ dòʼshwiiy fòn laàr wír e kisəə, yii bèy, a fiì kù rəər kfə́ rə́ərin.

¹⁵Fòn bvəti vishí, wíri wàa dzə e dzə̀ʼə̀m, a koŋ rəə́ dzə̀ moo mbàʼ wuù.

¹⁶Kí bòŋ fó a ker vifií, e shaà *kisha ke mbàm ke baar kí, e bòŋ fó a kiíy jeéyjeéy fó vinyò, e shaà kisha ke mbàm ke fəvír kí.

¹⁷Wìr lóo dzə là jay, lóo ghan, wù wàa bàʼàr kinyo ke bi kí. Wìr lóo tiír kiwuú, lóo fìʼ, wù kìŋsìn dzəʼə̀m rə́.

¹⁸Wìr kóʼor wún, wù nèn lò gbù, lóo yen kitu kfə́, wù tò é kinyò.

¹⁹Bòŋ, e lì kitú ké shishàr, a dzə vèn à vé ŋgeʼe, e shaà fóo jàv vifá ve kimfaàsì vèn à vé kiŋàʼa.

²⁰Wìr yú ntir, wù kùy, a bòŋ ké wìr wo wù tiir vifií a dzə̀ e NYÙY TǍR wùn.

²¹Fiì dzə̀ wír wo wù kiìn jeéyjeéy fó vinyò, a kiláyláy kfə́ ke juŋ ki dzəsì yéʼéy e wíri.

²²Wìr keéri vifií, bo wù sí kér ntoò ndzə̀v ye yì fó wun dzəʼə̀m, aá kù yii sər viyúŋ, a dzə̀ e kiyúŋsì kév kí.

²³Fiì lo, wù wàa səʼə́m, e bó a suúy kinyo, jí sə́ se juŋ si wàa bìnèr vifií vé wíri.

²⁴Jí se juŋ si dzə̀ moo ghám vilù, sí nyom e shuù, baʼrì jav wùn.

²⁵Dzəə̀ ye wìr msòŋ yén ji ye juŋ, kù lo, e jòʼsì a dzə̀ é kpu.

²⁶Wìr lóo dzə e jìŋ, yì wàa banrí wun bánrín, shuu vəə́ kù a banrí wun ji wù wáa lìm kitávín.

²⁷Wìr kisaŋ yii bá kfə́ a dzə̀ kinyo ke bi kí, a dzə̀ shuu vəə́ tòn kirə́ʼ.

²⁸Ayìíkumé samèr melaà e wírí mvəm, a ŋgaà viduu bvəər ŋkar si.

²⁹Ŋgaà melaà lévti ŋgaà shweèsí və, lévti, wù wày é ŋgeʼ.

³⁰Wìr lóo bvəə sí, bo wù sí taáme ji wun yii kinyo ke bi kí, rə́ʼ shuu, bo wù sí taʼ, e bùʼ kinyo.

³¹Kitú ke fəvír kí dzə̀ ntáraʼ vikùʼùy, a dzə̀ vilaámé vé dzə̀ʼə̀m yee tìítiy.

³²Wìr wo wù rəər dòʼshwíiy və bòŋ, e shaà ntav, a wo wù kfə́menè bòŋ, e shaà ŋgaà rə̀r wo wù soon ŋkàlaʼ.

³³Wíri lo, á shwèŋ kinyo shwéŋén, yii bèy, a kinyo ke ru kí kù yii din NYÙY TÀR.