Read Lamnso Ŋgàn 17 Bible Online

Ŋgàn 17 - Lamnso bible

Ŋgàn 17

¹Bòŋ a yi kimbéʼ ke kiban e lav nyaáŋ, e shaà ŋkàʼ wó a yi e lav kinyàm.

²Kwàné lóo lìm kijuŋ, wú wàa saʼ wan laʼ, lóo lìm kijuŋ, wú jàv vitsə́ʼ wùn à wón laʼa.

³Á yii sheŋrì *kisha ke mbàm ke fəvír kí, à ke baar kí e və́yí, a kù dzə̀ mo NYÙY TÀR tar melív me wíri.

⁴Ŋgaà yiì ye bií yii yuúri a dzə̀ ntir se bi sí, a ŋgaà lam baà fó vituʼùr a dzə̀ é lǎm kisaŋe.

⁵Wìr wo wù té lám e ŋgaà kitàn, kuu a dzə̀ Nyùy woo ŋgaà mbom və, a wo wù shéʼ ŋgeʼ se wùmòʼ yòʼ wíy bòy fo ŋgeʼlàʼ.

⁶Ntáraʼ vidzəə̀nè kù dzə̀ wón won, a vijuŋ ve won ví kù dzə̀ atàr vév.

⁷Kiyúŋ kí yòʼ yii tíy e ntir, a bó ŋgaà saʼ yòʼ yii tíy sa e kimboʼtì.

⁸Kòyàr lim fo ŋgaà fo moo shív, wù binkìr fo feé, wù kùʼ kúʼun.

⁹À laysìn jay wìr, wù gòʼ ji ŋkar yè. Wìr fəʼ jay wìr, wù bvə̀ə́r viŋkar vév.

¹⁰Ntir yii kér nsàv e ŋàŋ fo wìr wo wù kiiy jeéyjeéy fó kinyò, e shaà kindzəv wií ke á dzə̀vìn kiyúŋ shó.

¹¹Ŋgaà yiì ye bií kù yii koŋ a tsəy a dzə̀ kóy, aá kù yíi tsənsí ŋgaà ntum woo là mendzən fo wùn wó.

¹²Kí bòŋ, é wìr bvə́y e kiyìy ké bvərə̀ʼ[18] ke á koon wán kí kitu, e shaà fóo bvəy e kiyúŋ kí kitu, e yen kiyúŋsì kfə́.

¹³A wìr siir kinyo ke juŋ ki e ke bi kí, bo liì wo bi yòʼ wíy mày fo wun lav.

¹⁴Kinyam ki keʼè, kí wàa dzə moo lav ye yì shémé, kí ghèén ji á táv, e sə̀r fo melaà mè nəə́ shó.

¹⁵NYÙY TÀR ban ŋgaà nsaʼ wo wù tínen nsaʼ ŋgaà njò, fəər wun fo ŋgeʼ, a wù ban sa wo wù tínen nsaʼ lànjò, wáy wun e ŋgeʼ.

¹⁶Aá ton mbàm ji kiyúŋ kí keérí vifií, a bó kí yòʼ kér shií e yeʼéy, bo séʼ dzə̀ ka?

¹⁷Ŋkar wìr yii koŋ wun ghán sidzə̀m, a wìr shéʼri fə́r və bìʼ ghán sé ŋgeʼ.

¹⁸Kiyúŋ kí lo, kí yiì ŋkàʼmé, e tìím mbìy ji ŋgaà shweèsí və foo mbàm.

¹⁹Wìr wo wù koŋ kinyo ke bi kí yii táŋninè, a wo wù raʼsì wún yíi gbù.[19]

²⁰Wìr lóo ker shilív she bi shí, la vikuʼùy ví yòʼ a nəə́ wun. Wìr lóo boʼtí kimboʼtì, wù nə̀ə́ é ŋgeʼ.

²¹Wàn du e kiyuŋ, kitàr kí wàa rə̀m ntéŋ, a bó kitàr ké wan woo njìʼ ki yòʼ yú vijuŋ e wun dzə̀ʼə̀m.

²²Shilív shee nyaáŋ shí yii, a wìr dzə́ kitávín, a she ndzəʼə́n shí fó a dzə̀ kinjuùmé.

²³Wìr kisaŋ lo, wù nyàʼtí, e sə̀ kòyàr, e nèn bìn nsaʼ, e fò a dzə̀ e ŋgaà njò.

²⁴Wìr kiiy jeéyjeéy fó vinyò, wù wàa tiír vifií və́ a dzə̀ é kiíy, kiyúŋ kí wàa yaŋrí kfə́ kifá kidzə̀m yáŋrín.

²⁵Wàn du e kiyuŋ, kitàr kí wàa rə̀m ntéŋ, yúŋsi, wù wàa nyarír shilív shé kiyìy.

²⁶Dzə̀ kinyo ke bi kí fóo way lànjò é ŋgeʼ, a kí yoʼ ghèén sa ji á dzəv ŋgaà yiì ye juŋe.

²⁷Wìr wo wù súŋnin, sə́ʼəmè dzə̀ fií, a wìr wo wù lo ji weè dzə̀ kiíy.

²⁸Fə̀m kiyúŋ ke kí dzə́ kisə́sə, á kù li wun ji kiíy, wù sə́ti shuu və́, á kù a lì wun ji fií.